⚜️ Ийэ уонна аҕа буолуу - дьиэ кэргэн сүрүн төрдө, үөрүүтэ, дьоло
⚜️ Ийэ уонна аҕа буолуу - дьиэ кэргэн сүрүн төрдө, үөрүүтэ, дьоло Ийэ олоҕу биэрээччи, үчүгэйгэ уонна үтүөҕэ уһуйааччы, дьолу түстээччи буолар. Аҕа оҕону күүс- уох, эт- хаан уонна өй- санаа өртүлэринэн дэгиттэр, кыанар буолууларыгар уһуйааччы аналлаах. Алтынньы 18 күнэ - Саха сирин Ийэлэрин, Россия Аҕаларын күннэрэ. Бу күн чэрчитинэн Муома алын сүһүөх оскуолатыгар 4 "а" уонна 2 "а" кылаастарга "Ийэ, аҕа сылаас тапталынан" диэн музейнай уруок буолла. Уруокпут Муома оройуонун сайдыытыгар сүдү кылааттарын киллэрбит, 59 сыл ыал буолан олорбут Саха Республикатын үлэҕэ туйгуна Мария Романовна Скороходкинаҕа, Саха Республикатын культуратын туйгуна, Муома оройуонун уонна Хонуу бөһүөлэгин бочуоттаах олохтооҕо Семён Гаврильевич Сивцевкэ ананна . Кинилэр түөрт оҕону төрөтөн, иитэн, үөрэттэрэн, барыларын үрдүк үөрэхтээн, олох киэҥ аартыгар үктэннэрбиттэрэ. Семён Гаврильевич - мелодист, Муома оройуонун Өрөгөй ырыатын мелодиятын айан өлбөт- сүппэт үйэлээбитэ. Бүгүҥҥү уруокпут ыалдьыта Мария Романовна, Семён Гаврильевич төрөппүт кыыстара Сандаара Семеновна ийэлээх аҕатын туһунан истиҥ- иһирэх ахтыы оҥордо. Уруок Муома оррйуонун Өрөгөй ырыатынан саҕаланна. Сандаара Семеновна үрдүк үөрэхтээх библиотекарь. Уруок бүтүүтэ оҕолорго "Кинигэни элбэхтик ааҕыҥ. Кинигэни ааҕар киһи киэҥ билиилээх- көрүлээх буолар, саха тылын өрө тутуҥ" - диэн эттэ. Сандаара Семеновнаҕа ыалдьыттаан барбытыгар махталбытын тиэрдэбит. ✍🏻Слепцова Антонина Яковлевна. @indigir_uottara
Канал в каталоге Максиметера
159 подписчиков · Новости