Мэҥэ-Хаҥалас улууһун "КҮН" оҕо хамсааһынын тэрээһинэ — 28 мая 2026 г. в 11:38:52.345
Мэҥэ-Хаҥалас улууһун "КҮН" оҕо хамсааһынын тэрээһинэ Ыам ыйын 28 күнүгэр Майа сэлиэнньэтигэр "Кэрэли" оҕону эбии үөрэхтээһин киинигэр Мэҥэ-Хаҥалас улууһун "КҮН" оҕо хамсааһынын "Күнү кытта сырдаа, кэрэ кэскили түстээ!" диэн ааттаах Гаврильева Александра Романовна уонна Старостина Ольга Петровна оҕо хамсааһынын улуустааҕы тэрээһиннэрэ үрдүк таһымнаахтык буолан ааста. Улууспут 8 оскуолатыттан барыта 70 оҕо: В.П. Ларионов, Ф.Г. Охлопков аатынан Майа орто оскуолаларыттан, И.Г. Тимофеев аатынан Майа лицейиттэн, Т.Г. Десяткин аатынан Тумул, И.Г. Игнатьев аатынан Хара, Дмитрий Таас аатынан Хорообут, В.В. Скрябин аатынан Чүүйэ, Алтан орто оскуолатыттан уонна "КҮН" оҕо хамсааһынын тэрийбит Өрөспүүбүлүкэтээҕи лицей-интернатыттан ыҥырыылаах ыалдьыттар кыттыыны ыллылар. Тэрээһин үөрүүлээх арыллыытыгар Мэҥэ-Хаҥалас улууһун үөрэҕирии салалтатын салайааччыта Плотникова Ирина Михайловна эҕэрдэ тылын эттэ. Ирина Михайловна оҕо хамсааһына төрөөбүт тылы, култуураны харыстааһыҥҥа, сайыннарыыга улахан суолталааҕын, кэлэр көлүөнэҕэ ийэ тыл иҥэрэр күүстээҕин бэлиэтээтэ. Ону таһынан, 2023 сыллаахха «КҮН» оҕо хамсааһынын төрүттээбит Өрөспүүбүлүкэтээҕи лицей-интернат саха тылын уонна литэрэтиирэтин учуутала Заровняева Сибэкки Аркадьевна уонна Өрөспүүбүлүкэтээҕи «Сайдыы» саха тылын, литэрэтиирэтин уонна култуура учууталларын ассоциациятын бэрэссэдээтэлэ Дагданча Анастасия Гаврильевна хамсааһын үлэтин-хамнаһын, методикатын, инники соруктарын туһунан ис хоһоонноохтук кэпсээтилэр, кыттааччылары ситиһиилэринэн эҕэрдэлээтилэр уонна хас биирдии оҕо төрөөбүт тылын иҥэринэн, саха буолан, сүрэхтэригэр илдьэ сылдьалларыгар баҕа санааларын тиэртилэр. Мэҥэ-Хаҥалас улууһун "Ытык сүбэ" салайааччыта, алгысчыт Игнатьев Зиновий Иванович оҕолорго сахалыы төрүт үгэспитин, алгыс сиэрин-туомун, кут-сүр үөрэҕин туһунан ис хоһоонноохтук кэпсээтэ, оҕолорго улахан интэриэһи үөскэттэ. Иккис чааһыгар оҕолор бэйэлэрин билиһиннэрэн, ыллаан-туойан, үҥкүүлээн эҕэрдэлэрин тиэртилэр. Онтон хамаанданан арахсан, "Күнү кытта сырдаа, кэрэ кэскили түстээ" диэн тиэмэҕэ бырайыактарын толкуйдаан, көмүскээтилэр. Эбиэт кэннэ кыттааччылар Комсомуол болуоссатыгар тохтобулларынан күрэхтэстилэр. Бырайыак бөлөҕөр "Күн оҕолоро" онтон тохтобул күрэҕэр "Сомоҕолоһуу" хамаандата кыайыыны ситистилэр. Күрэх түмүгүнэн оһуокайдаан, ойор-тэбэр оҕо саас биир бэлиэ кэрэ кэмэ олус сэргэхтик ааста. Оһуокайы эттилэр: Карина Никифорова (Чүүйэ орто оскуолатын 10 кылааһын үөрэнээччитэ), Сайаана Стручкова (Майа лицейин 8 кылааһын үөрэнээччитэ), Вероника Эверстова уонна Алиса Птицина (Тумул орто оскуолатын 8 кылааһын үөрэнэччилэрэ). Тэрээһин түмүгүнэн сүрүн сыал-сорук туруорулунна — хас биирдии оскуолаҕа "КҮН" оҕо хамсааһынын салааларын тэрийии уонна үлэлэтии. Бүгүн кыттыбыт бары оҕолорго, салайааччыларга, учууталларга махталбытын тиэрдэбит! Төрөөбүт тылбытын, култуурабытын харыстыаҕыҥ, сайыннарыаҕыҥ! "Кэрэли" медиа-киин Аргунова Вера Михайловна