Бүгүн муус устар 17 күнүгэр Филипп Гаврильевич Охлопков 90 сааһыгар аналлаах «Живое нас...
Бүгүн муус устар 17 күнүгэр Филипп Гаврильевич Охлопков 90 сааһыгар аналлаах «Живое наследие: диалог традиций и современности» бырайыак чэрчитинэн Ходоро нэһилиэгин Хатыҥ Ай аатынан култуура киинигэр журналист буолуон баҕалаах оскуола оҕолоругар аналлаах аһаҕас күрэс бастакы түһүмэҕэ буолла. "Бырайыак сыала: Ходороттон төрүттээх биллэр дьоммут-сэргэбит үлэлэрин сырдатыы. Ол чэрчитинэн Ф.Г. Охлопков Ходоро алааһыттан төрүттээх, биһиги биир биллэр политическай деятельбит, журналиспыт туһанан кини олоҕун, үлэтин оҕолорбут үөрэтиннэр, чинчийдиннэр диэн санааттан бу күрэс бастакы түһүмэҕэ бүгүн саҕаланна"-диэн култуура киинин дириэктэрэ Саргылаана Иннокетьевна Атласова иһитиннэрдэ. «Кэрэли» оҕону эбии үөрэхтээһин киинин «Мультимедийнай журналистика» куруһуогун оҕолоро — Света Лепчикова, Саша Яковлева, Арчылаана Федорова — күрэскэ кыттыыны ылан, салгыы үлэлэрин суруйан, хаартыскаларын таҥан, видео оҥорон кэтэхтэн иккис түһүмэххэ ыытыахтара. Күрэс хас да түһүмэхтээх, муус устар ый устата буолар. Ларионов уонна Охлопков аатынан Майа орто оскуолалара, Павловскай, Скрябин аатынан Чүүйэ оскуолата, ону таһынан кэтэхтэн Чамайыкылар кыттыыны ыллылар. Бу күҥҥэ Филипп Гаврильевич олорбут дьиэтигэр мемориальнай дуоска үөрүүлээх аһыллыыта буолла. Оҕолор Ф.Г. Охлопков архыып матырыйаалларын көрдүлэр: оскуолаҕа сылдьан үөрэммит тэтэрээтиттэн саҕалаан, ыспыраапкаларын, хаһыаттарын, ыстатыйаларын, биографиятын, оҕо күннүгэ, кылаас сурунаала баалларын сэргээтилэр уонна олорбут дьиэтигэр киирэ сырыттылар. Филипп Гаврильевич олоҕун туһанан Хатыҥ Ай аатынан культура киинин исписэлииһэ Галина Васильевна Константинова сырдатта уонна Чүүйэ библиотекара Мария Васильевна Левина Филип Гаврильевич туһунан суруллубут кинигэлэри, хаһыаттары көрдөрдө. Ордук чопчулаан «Ходоролор» уонна «Сахаларга саҥа сурук» диэн кинигэлэри булан, оҕолорго көмө оҥосторго сүбэлээтэ. Аркадий Николаевич Дмитриев (Ходороҕо баар бааһынай хаһаайыстыба салайааччыта) уонна Семен Николаевич Дмитриев (биир дойдулаахтара) Филипп Гаврильевич туһунан оҕолорго интервью биэрдилэр, боппуруостарга хоруйдаатылар. Оҕолор алааска сэргии көрөн, Кыайыы 65 сылыгар анаммыт паамытынньыгы колхозтаахтар оҕолоро кыттыһан сэриигэ барбыт дьоннорун туһунан оҥорбуттарын баран көрдүлэр. Олохтоохтор Ходоро алааска саха ынаҕын, сылгытын иитэн сайылыктаан, кыстаан, күн уотунан иитэр батареянан уоттанан олороллорун сөхтүлэр. Ходоро ытык ыалын эбээтэ Варвара Николаевна Дмитриева сибиэһэй сүөгэйинэн кыттааччылары уонна тэрийээччилэри күндүлээтэ. Ходоро олохтоох дьаһалтатыгар уонна Хатыҥ Ай аатынан культура киинигэр, Ходоро олохтоохторугар барҕа махталбытын тиэрдэбит. Күммүт этэҥҥэ туран биэрдэ. Киэһэтин суол лаппа ириэрдэ. Бука аҕыйах күнүнэн суол хаалыа эбит. Оҕолор сибиэһэй сааскы салгыҥҥа сылдьан алаадьылаах саха ынаҕын сибиэһэй сүөгэйин амсайан, онтон олохтоох дьаһалтата минньигэс пловунан, итии чээйинэн күндүлээтилэр, оҕолор күрэскэ матырыйаалларын хомуйан, хаарынан бырахса оонньоон, хаар киһи оҥорон, сылгы чыычааҕын уонна элиэ кэлбитин көрөн, ынах-сүөһү, саҥа төрөөбүт кулунчугу олус диэн сөхтүлэр, астына-дуоһуйа сынньаннылар даҕаны, кэлэн иһэн кытаанахтык утуйан Майаҕа тиийэн кэлбиттэриттэн соһуйан эрэ хааллылар. Кыттааччыларга күрэс иккис түһүмэҕэр этэҥҥэ кыттыыны ыларгытыгар баҕарабыт!