#ОлоҥхоЫһыаҕа-2026 — 5 июля 2026 г. в 08:01:41.842
#ОлоҥхоЫһыаҕа-2026 От ыйын 3–5 күннэригэр «Кырсалыы кылыһахтаан, Куоҕастыы куйуһутан, тахсар күн сардаҥатынан олоҥхолоох олоҕу туойдахпына…» диэн олоҥхону толорооччулар өрөспүүбүлүкэтээҕи күөн күрэстэрэ ыытылла турар. Бу үс күн устата саха норуотун барҕа баай айымньытын — Олоҥхону үйэтитиигэ, тарҕатыыга анаммыт далааһыннаах тэрээһин оҕолору, ыччаты уонна улахан дьону биир түһүлгэҕэ түмэр. Тэрийээччилэр күрэһи сааһынан көрөн арааран, кырачаан толорооччулар бэйэлэрин бөлөхтөрүгэр, ыччаттар эдэр эрчимнэрин, санааларын ууран, улахан дьон маастарыстыбаларын чаҕылхайдык арыйан, туспа былаһааккаларынан күөн көрсөллөр. Оҕолор бөлөхтөрүгэр Чурапчы улууһуттан хас да оҕо көхтөөхтүк кытынна. Кинилэр истэригэр Хатылы нэһилиэгиттэн эдьиийдии-бырааттыы Нарыйаана уонна Кирик Кривошапкиннар, ону тэҥэ Хоптоҕо нэһилиэгин ыччата Инглат Бочкаров бааллар. Эдэр толорооччулар олоҥхолорун ис дууһаларыттан иэйэн-куойан, сүргэлэрэ көтөҕүллэн толороннор, көрөөччүлэр биһирэбиллэрин ыллылар. Бу маннык улахан тэрээһиҥҥэ олоҥхону толорооччу оҕолор ахсааннара элбээн иһэриттэн киһи үөрэр. Саха тылын сүмэтин, кутун-сүрүн илдьэ сылдьар Олоҥхобут көлүөнэттэн көлүөнэҕэ бэриллэн, сайдан иһэрэ көстөр. @sanaoloh @ulusmedia