Үүнэр ыччаты үтүөҕэ-кэрэҕэ уһуйар, билиигэ сирдиир үрдүк аналлаах учууталлар, педагогт...
Үүнэр ыччаты үтүөҕэ-кэрэҕэ уһуйар, билиигэ сирдиир үрдүк аналлаах учууталлар, педагогтар уонна ытыктабыллаах ветераннарбыт! Үөрэхтээһин сайдыытыгар көмүс кылааттарын киллэрбит, күннэтэ сыралаах, айымньылаах үлэлэринэн үгүһү ситиһэ, уһуйа сылдьар үтүөкэн дьоммутугар, Чурапчы улууһун үөрэҕин салалтатын уонна тус бэйэм ааппыттан Учуутал күнүнэн итии-истиҥ махталбын, эҕэрдэбин тиэрдэбин. Биһиги, чурапчылар, үөрэхтээһин сайдыытыгар дириҥ силистээх, ураты суоллаах-иистээх үлэни тэнитэн иннибит диэки хардыылыыбыт. Улууспут киэн туттуутунан тыа сиригэр үс үөрэх ситимин - уопсай, орто уонна үрдүк идэ биэрэр үөрэхтээһини утумнаахтык сайыннарыы буолар. Саха норуотун ааттаппыт чулуу дьоммут - Өксөкүлээх Өлөксөй, Сэмэн Новгородов, Георгий Башарин, үгүс учуонайдар, бары хайысхаҕа үтүөлээх үлэһиттэр улууспут оскуолаларыттан кынат анньынан тахсыбыттарынан киэн туттабыт. Хас биирдии ыытыллар уруок, дьарык кэнчээри ыччаппытын үүнэр-сайдар суолга эрэллээхтик үктэннэрэр, төрөөбүт дойдуга тапталы иҥэрэр үрдүк соруктаахтар. Быйыл кэлбит улахан ситиһиилэр эһиги маастарыстыбаҕыт үрдүк таһымын, үлэҕитигэр дьулуургутун көрдөрдө. Оҕолорбут түөрт сыл субуруччу "Инникигэ хардыы" научнай конференция, үсүһүн "Спортивные Якутяне" спартакиада кыайыылаахтара буоллулар, "Профессионалы" сатабыл күрэҕэр республика үс бастыҥ улууһун иһигэр киирдибит. Чурапчы гимназиятын үс выпускницата муҥутуур 100 баалы ылан хаһан да буолбатах ситиһиини аҕалан үөртүлэр. Идэ маастарыстыбатын күрэҕэр чаҕылхай ситиһиини гимназия омук тылын учуутала Юлия Мироновна Макарова аҕалла. Кини республикаҕа кыайан, Россия таһымыгар Саха сирин чиэһин ситиһиилээхтик көмүскээтэ, Чурапчы улууһун ааттатта. Инники көлүөнэ педагогтар бэриниилээх, дьаныардаах үлэлэрэ үтүө холобур буолар, утум салҕанар. Оҕо кутун тутар айымньылаах, киэҥ көрүүлээх уустук үлэҕитигэр үгүс боччумнаах ситиһиилэри, махталлаах үөрэнээччилэри, дьиэ кэргэҥҥитигэр чэгиэн-чэбдик, дьоллоох олоҕу, үлэ коллективтарыгар норуоппут уот харахха эппит "Үөрэх — үтүө аартык, үлэ — үрдүк дьол" өс хоһоонунан сирдэтэн түмсүүлээх үлэни баҕарабын! Чурапчы улууһун үөрэҕин салалтатын начальнига Юрий Павлович Посельскай.