Канал МБОУ "Ботулинская СОШ им. Золотарева Н.А."
Образование · 7 октября 2026 г.
Үөрэх үлэһиттэрин бэтэрээннэрэ-Боотулууга.
Үөрэх үлэһиттэрин бэтэрээннэрэ-Боотулууга. Улуустааҕы үөрэх салалтатын көҕүлээһининэн, үөрэх үлэһиттэрин бэтэрээннэрин Сэбиэтин тэрээһининэн Учуутал күнүн, аҕам саастаахтар күннэрин чэрчитинэн 19 киһилээх улуус бэтэрээн учууталлара Н.А. Золотарев аатынан Боотулуу орто оскуолатыгар педколлективы кытта оскуола үлэтин – хамнаһын билсэр сыаллаах көрсүһүүгэ тахса сырытта. Сарсыарда улуустааҕы үөрэх салалтатын начальнига Леонид Николаевич бэтэрээннэри кытта көрсөн, Учуутал, аҕам саастаахтар күннэринэн эҕэрдэлээтэ уонна кинилэргэ ис сүрэхтэн анаммыт тэрээһиҥҥэ астына – дуоһуйа сылдьан, элбэҕи билэн – көрөн кэлэллэригэр баҕаран туран, көхтөөх айаҥҥа атаарда. Бэтэрээннэр Леонид Николаевич СР үөрэххэ уонна наукаҕа министиэристибэтин анал комиссиятын ааһан Үөһээ Бүлүү улуүһун үөрэҕин салалтатын салайааччытынан анаммытынан эҕэрдэлээтилэр, кини үөрэхтээһиҥҥэ салайыы бары үрдэлин ааспыт салайааччы буоларынан, улууска үөрэхтээһини сайыннарыыга боччумнаах хардыылары оҥороругар эрэнэллэрин эттилэр. 2024 сыллаахха үлэҕэ киирбит аныгы ирдэбилгэ толору сөп түбэһиннэрэн тутуллубут 165 миэстэлээх оскуола, улууспутугар чуолаан тыа сиригэр суох баараҕай тутууну көрөн, бэтэрээннэрбит сүргэлэрэ көтөҕүллэн үөрэн – көтөн кэллилэр. Оскуола 1919 сыллаахха алтынньы 1 күнүгэр арыллан, бу күнү оскуола төрөөбүт күнүнэн бэлиэтээһин үтүө үгэскэ кубулуйбут. Күн бүгүн Боотулуу бастакы үөрэхтээх дьоннорун сыдьааннарын салгыыр 3 улахан педагогическай династиялар - Золотаревтар, Боескоровтар, Прокопьевтар оҕолоро, сиэннэрэ Аҕа көлүөнэ үгэһин салҕаан, үлэлии, айа – тута сылдьалларыттан киһи эрэ үөрэр. Оскуола коллектива саха сиэринэн ыалдьыттары арыылаах алаадьынан, итии үүттээх чэйинэн көрүстэ, салгыы 2 этээһинэн оскуоланы көрүү буолла. Хас биирдии кабинет саҥаттан саҥа өйдөбүлү, киэн туттууну сүрэхпитигэр сахта. Манна оскуола коллектива бэйэлэрин күүстэринэн тэрийбит музейдара саҥа оскуолаҕа киирэн саҥалыы тыыннанан, баай ис хоһооннонон ааспыт үйэ килбиэннээх олоҕун, үлэтин көрдөрөн кэпсии турарыттан аҕам саастаах бэтэрээннэр сүрдээҕин долгуйдубут. Билигин оскуола 89 үөрэнээччилээх, манна 25 педагог үлэлиир. 25 миэстэлээх интернаттаах. Саҥа оскуола 105 сааһын туолуутугар сөп түбэһиннэрэн, 2024 сыллаахха үлэҕэ киирбитэ. Салгыы бэтэрээннэрбит былааннаммытын курдук, кылаастарынан тарҕаһан үөрэнээччилэри кытта көрсүһүүлэри, боччумнаах кэпсэтиилэри, үөрэнээччилэргэ трениннэри, оскуола иһинэн үлэлиир телестудия оҕолоругар интервьюлары биэрдилэр. Мантан салгыы оскуола педколлективын кытта аһаҕас кэпсэтии буолла. Оскуола директора Семен Семенович коллектив үлэтин, инники былааннарын билиһиннэрдэ. Кэлбит делегация аатыттан К.В. Борисова коллективы эҕэрдэлээтэ, республика, улуус үөрэҕин сайдыытыгар турар инники соруктар тустарынан кэпсээтэ, бу сылга бэлиэ саастарын туолбут үлэһиттэргэ наҕараадалары туттарда, үлэһит коллективка ситиһиилэри баҕарда. Үөрэнээччилэри кытта үлэлээбит специалистар оҕолор олус көхтөөхтөрүн, билиигэ – көрүүгэ сэргэхтэрин, тардыһыылаахтарын бэлиэтээтилэр. Ыраах сытар тыа сирин оскуолата ыччаты үөрэхтээһиҥҥэ, иитиигэ толору кыахтааҕын көрдөрдө. Сахабыт сирин үрдүкү салалтата, Ил Дархаммыт Айсен Николаев, улууспут салалтата, Баһылык Валерий Николаев Сахабыт сирэ, улууспут сайдыытыгар бириэмэтигэр сөптөөх политиканы ыыта олороллорун чаҕылхай туоһута буоларын көрөн итэҕэйдибит. Улууска бэйэлэрин кэмнэригэр оччотооҕу ыарахан да кэмнэргэ үлэ бөҕөнү үлэлэлээбит, оҕо бөҕөнү үөрэппит ытыктабыллаах бэтэрээннэрбит билиҥҥи балысхан сайдыылаах үйэ биир бастыҥ үөрэҕин тэрилтэтин көрөр кыах тосхойбутугар улуустааҕы үөрэх салалтатын саҥа анаммыт салайааччытыгар Леонид Николаевич Огочоновка бэйэлэрин ис сүрэхтэн махталларын этэллэр, олус эппиэттээх үлэтигэр ситиһиилэри баҕараллар. #УправлениеОбразования #Ботулу #День Учителя