Канал МБОУ "Харанская спортивная СОШ им. И.Г.Игнатьева"
Лайфстайл · 11 апреля 2026 г.
АФАНАСИЙ ИЛЛАРИОНОВ 80 СААҺЫГАР АНАЛЛААХ ҮӨРҮҮЛЭЭХ ТЭРЭЭҺИН УОННА МАРАФОН
АФАНАСИЙ ИЛЛАРИОНОВ 80 СААҺЫГАР АНАЛЛААХ ҮӨРҮҮЛЭЭХ ТЭРЭЭҺИН УОННА МАРАФОН Муус устар 10 күнүгэр, Хара нэһилиэгэр, педагогическай үлэ уонна спорт бэтэрээнэ, чэпчэки атлетикаҕа уонна хайыһарга ССРС спордун маастарыгар хандьыдаат Илларионов Афанасий Петрович 80 сааһын туолуутугар аналлаах үөрүүлээх тэрээһин уонна кини аатынан үгэс быһыытынан иккис сылын ыытыллар марафон буолан ааста. Афанасий Илларионов 1946 сыллаахха олунньу 20 күнүгэр Чурапчы улууһун Хайахсыт нэһилиэгэр төрөөбүтэ. Кини биология, химия уонна физкультура учуутала, педагог-валеолог идэлээх. 1978 сыл балаҕан ыйыттан Мэҥэ Хаҥалас улууһун үөрэҕириитин салалтатыгар инспекторынан үлэлээбитэ. Кини көҕүлээһининэн 1983 сыллаахха улууска Майатааҕы оҕо-ыччат спортивнай оскуолата арыллыбыта. Афанасий Петрович бу оскуоланы уонча сыл салайбыта. Оттон 1994 сыллаахха Хара спортивнай лицейин төрүттээбитэ, онно 17 сыл тухары дириэктэринэн таһаарыылаахтык үлэлээбитэ. Үөрүүлээх тэрээһиҥҥэ улуус баһылыгын бастакы солбуйааччы Гаврил Толстяков, Хара нэһилиэгин баһылыга Дария Назарова, физическэй култуура уонна спорт салалтатын салайааччыта Алексей Попов, Хара спортивнай оскуолатын дириэктэрэ Алексей Оконешников эҕэрдэ тылларын эттилэр. Кылаабынай судьуйа Павел Васильев марафон кыттыылаахтарын эҕэрдэлээтэ. Күрэхтэһиигэ экэниэмикэ билим дуоктара, бэрэпиэссэр, СӨ норуотун үтүөлээх үлэһитэ Александр Пахомов уонна маҕан таастаах спорт көрүҥэр СӨ сүрүн тириэньэрэ, Арассыыйа чемпионатын призера Василий Спиридонов уонна Амма, Уус-Алдан, Чурапчы,Өлүөхүмэ улуустарыттан, Дьокуускай куораттан барыта 23 кыттааччы кыттыыны ыллылар. Наҕараадалааһын түгэнигэр, улуус баһылыгын бастакы солбуйааччы Гаврил Толстяков Афанасий Илларионовка "Манчаары дойдута - мин дойдум» диэн бэлиэнэн наҕараадалаата, Ил Түмэн дьокутаата Андрей Находкин Ил Түмэн Бочуоттаах грамотатын кыһыл көмүс бэлиэлээх туттарда. 15 километрга марафон түмүктэрэ: Дьахталлар: 1 м — Татьяна Артемьева (Дьокуускай) 2 м — Саргылана Логинова (Өлүөхүмэ) 3 м — Лия Золотарева (Үөһээ Бүлүү) Эр дьон: 1 м — Роман Алексеев (Дьокуускай) 2 м — Мирослав Бурнашев (Уус Алдан) 3 м — Айсенбег Черепанов (Амма) Тэрээһин үөрүүлээх быһыыга-майгыга түмүктэннэ. Бары кыттааччылар Афанасий Петровичка чэгиэн туругу, уһун үйэни уонна саҥа ситиһиилэри баҕардылар. Мэҥэ Хаҥалас улууһун дьаһалтатын пресс - сулууспата Сүрүн сонуннары МАХ сыһыарыыга суруттаран ааҕыҥ: 💬Мэҥэ Хаҥалас улууһун дьаһалтата 💬 Улуус баһылыга Дмитрий Тихонов