💐Күндү үөрэнээччилэр, төрөппүттэр, учууталлар уонна быйылгы выпускниктар! — 26 мая 2026 г. в 01:53:50.477
💐Күндү үөрэнээччилэр, төрөппүттэр, учууталлар уонна быйылгы выпускниктар! Уус Алдан улууһун үөрэҕин салалтатын аатыттан 2025-2026 үөрэх дьыла түмүктэммитинэн, бүгүҥҥү долгутуулаах «Бүтэһик чуораан» күнүнэн истиҥник эҕэрдэлиибит! Хас биирдии үөрэх дьыла биһиги оҕолорбутугар, учууталларбытыгар сырдык аартыктары арыйар, үрдүк сыаллары туруорар. Бүтэһик чуораан бырааһынньыга ону барытын түмэр, түмүктүүр, туйгун выпускниктарбытын, спортка, наукаҕа, искусствоҕа ситиһиилээхтэри чиэстиир үөрүүлээх, өрөгөйдөөх кун. Быйылгы үөрэх дьылыгар улууспут үрдүнэн 33 оскуолаҕа 3272 оҕо үөрэннэ, 9-ус кылааһы 357 оҕо, 11-ис кылааһы 225 оҕо бүтэрэн түмүктүүр эксээмэннэри туттарыахтара, 16 выпускник мэтээлгэ (6 кыһыл көмүскэ, 10 үрүҥ көмүскэ), ону тэҥэ сүрүн оскуоланы бүтэрээччилэртэн 14 оҕо туйгун үөрэнээччи аттестатын ыларга дьулуһаллар. Оҕо бары өттүнэн сайдыылаах буоларыгар туһуламмыт араас тэрээһиннэр, олимпиадалар, күрэхтэһиилэр, кэмпириэнсийэлэр улууспутугар былааннаахтык ыытылыннылар. Оҕолорбут кэккэ ситиһиилэриттэн үөрэбит. Ол курдук Бүтүн Арассыыйатааҕы үөрэнээччилэр олимпиадаларын улуустааҕы түһүмэҕэр 2032 оҕо кыттан, 348 кыайыылаах уонна призер буолбуттара. Өрөспүүбүлүкэтээҕи түһүмэххэ 62 оҕо ыҥырыллан, 5 оҕо 6 олимпиадаҕа кыайыылаах, 12 оҕо призер буолары ситиспиттэрэ. Өрөспүүбүлүкэтээҕи 30-ус «Инникигэ хардыы» эдэр чинчийээччилэр кэмпириэнсийэлэригэр улууспутуттан кыттыбыт 54 үөрэнээччиттэн 31-рэ республика призердарынан уонна лауреаттарынан буолбуттара. Хамаанданан күрэххэ И.Н. Жирков аатынан Дүпсүн орто оскуолата «Школы «Точки роста» 1 миэстэни, Лөгөй лицей - интерната «Школы повышенного уровня» 3 миэстэни ылары ситистилэр. 25 оҕо Арассыыйа таһымнаах научнай-чинчийэр кэмпириэнсийэлэргэ ситиһиилээхтик кыттан кэллилэр. «Барҕарыы» II өрөспүүбүлүкэтээҕи түһүмэҕэр биһиги улуустан 23 оҕо кыттыбыта. Хамаанданан Уус Алдан улууһа 1 миэстэни ылла. Кэмпириэнсийэ түмүгүнэн кылаан чыпчаалы 5 о5о ылары ситистилэр. Бу үөрэх дьылыгар улуустааҕы «Профессионалы» күрэххэ 24 компетенцияҕа 14 оскуолаттан 174 оҕо кыттыыны ылла. Кыайыылаах оҕолор улуустарын чиэһин өрөспүүбүлүкэҕэ көмүскээн 12 оҕо призер буолары ситистилэр. «Профессионалы» бүтүн Арассыыйатааҕы күрэххэ улуустан 3 оҕобут ситиһиилээхтик кыттан кэллилэр. Доруобуйаларынан хааччахтаах оҕолорго анаан ыытыллар «Абилимпикс» национальнай чемпионатын региональнай этабын компетенцияларыгар Мүрү №1-дээх орто оскуолатын 8,10 кылааһын үөрэнээччилэрэ уонна Орто-Эбэ коррекционнай оскуолатыттан 7 оҕо араас компетенциларга кыттан призер буолары ситистилэр. Идэлэринэн күрэстэргэ улууспут 10 педагога ситиһиилээхтик кытыннылар. Инновационнай хайысхаҕа үөрэх сылыгар Республикатааҕы инновационнай площадка аатын Суотту, Курбуһах, Мүрү 2 №-дээх, Түүлээх, Танда орто оскуолалара, В.В. Алексеев аатынан Мүрүтээҕи уолаттар гимназиялара, Улуустааҕы эбии үөрэхтээһин киинэ көмүскээтилэр, Лөгөй лиссиэй-интерната, Майаҕас, Сыырдаах орто оскуолалара, Окоемовка сүрүн оскуолата инновационнай площадкаҕа кандидат буоллулар. 💐Убаастабыллаах үөрэнээччилэр, учууталлар, төрөппүттэр! Өссө төгүл «Бүтэһик чуораан»күнүнэн истиҥник эҕэрдэлиибит, үлэҕитигэр, үөрэххитигэр үрдүк ситиһиилэри! Кундү выпускниктар! Экзаменнаргытын ситиһиилээхтик туттаран, олох киэҥ аартыгар үктэниҥ, талбыт үөрэххитигэр киирэн, идэлээх үлэһит буоларгытыгар! Төрөппүттэргит, оскуолаҕыт, төрөөбүт дойдугут киэн туттар дьоно буола үүнэ–сайда турун!👏🏻👏🏻👏🏻