Министерство по национальной политике и связям с общественностью Республики Алтай
Без категории · 27 августа 2026 г.
Майма аймактыҥ Урлу-Аспак јуртында Россияда албатылардыҥ бирлигиниҥ, Алтай Республиканы... — 27 августа 2026 г. в 07:17:02.765
Майма аймактыҥ Урлу-Аспак јуртында Россияда албатылардыҥ бирлигиниҥ, Алтай Республиканыҥ тӧзӧлгӧнинеҥ ала 35 ле алтай калыктыҥ Арасей тергееге бойыныҥ кӱӱниле киргенинеҥ ала 270 јылдыктарына учурлай «Бис јаба — Бис бирлик» деп VI граждан форум ӧткӧн. Форумныҥ баштапкы кӱнинде Майма јуртта культураныҥ тӧс јеринде болгон семинар-јуунда Россия Федерацияныҥ калыктар ортодогы государстволык эл политиказын јӱрӱмде бӱдӱрериниҥ сурактары шӱӱжилип кӧрӱлген. Бу семинарда федерал ла государстволык органдардыҥ јасакчы ла бӱдӱреечи јаҥдарыныҥ, бойын бойы башкарынарыныҥ јербойындагы органдарыныҥ, Алтай Республиканыҥ Јондык палатазыныҥ ла оныҥ муниципал тӧзӧлмӧлӧрдӧги бӧлӱктериниҥ, јондык биригӱлердиҥ чыгартулу улузы, культураныҥ, ӱредӱ бӧлӱгиниҥ башкараачылары, МВД-ныҥ, ФСБ-ныҥ ла прокуратураныҥ ишчилери турушкандар. Экинчи кӱнде Урлу-Аспак јуртта Культураныҥ туразында ӧткӧн пленар јуунныҥ туружаачыларын Алтай Республиканыҥ башчызы А. Турчак, Эл Курултайдыҥ председатели Э. Ялбаков, Алтай Республикада баш федерал инспектор К. Бирюков, национальностьтордыҥ керектери аайынча федерал агентствоныҥ јааныныҥ ордынчызы ла статс-качызы А. Котова, телекейдиҥ калыктарыныҥ бийик консультативный совединиҥ турчызы, Этнический журналистиканыҥ гильдиязыныҥ президенти, РФ-тыҥ президентинде калыктар ортодогы советтиҥ турчызы М. Лянге, Россияныҥ Албатыларыныҥ ассамблеязыныҥ гендиректорыныҥ ордынчызы, ороонныҥ тергеелериле иштеер ӱлекердиҥ координаторы Н. Абдуганиев, Кемероводогы эл-тергеелик университеттиҥ тӱӱки аайынча кафедразыныҥ башкараачызы В. Шиллер, Алтай Республиканыҥ башкарузыныҥ јашӧскӱримниҥ политиказы ла спорт аайынча министри А. Суразов уткугандар. Бойлорыныҥ уткуулду сӧстӧрин видеокӧрӱ ажыра анайда ок РФ-тыҥ президентинде калыктар ортодогы советтиҥ турчызы, РФ-тыҥ Јондык палатазыныҥ камызыныҥ јааны В. Зорин ле РФ-тыҥ президентинде калыктар ортодогы советтиҥ турчызы, калыктардыҥ туразыныҥ директоры А. Полежаева айткандар.