Бэс ыйын 5-6 күннэригэр Бүлүү бөлөх улуустарын үлэ бэтэрээннэрин Х спартакиадата Сунтаа... — 7 июня 2026 г. в 00:02:36.418
Бэс ыйын 5-6 күннэригэр Бүлүү бөлөх улуустарын үлэ бэтэрээннэрин Х спартакиадата Сунтаарга ыытылла турар 🔹🔹Быйылгы үбүлүөйдээх Спартакиада дойдубутугар Норуоттар сомоҕолоһууларын, өрөспүүбүлүкэбитигэр Култуура сылларын чэрчилэринэн ыытыллар. Ону сэргэ Бүлүү улууһун бэтэрээннэрин сэбиэтин салайбыт, чөл, доруобай олоҕу көҕүлээччи, маассабай успуорду өрө тутааччы, бэтэрээннэр спартакиадаларын төрүттээччи Герасим Солтуев сырдык аатыгар анаммыт. 🔹🔹Бэтэрээннэр Спартакиадаларыгар Бүлүүттэн, Үөһээ Бүлүүттэн, Ньурбаттан уонна Сунтаар икки хамаандата, уопсайа биэс хамаанда успуорт 12 көрүҥэр күөн көрсүөхтэрэ. Кыттааччы күрэсчит ахсаана - 173. Кинилэр ортолоругар улуустарын, өрөспүүбүлүкэлэрин, дойдуларын элбэх күрэхтэһиигэ араас сылларга чиэстээхтик көмүскээбиттэр, таҺаарыылаах үлэлэринэн дойдуларын сайдыытыгар кылааттарын киллэрсибит үлэ бэтэрээннэрэ, туйгуннара бааллар. 🔹🔹Х Спартакиада аһыллыытыгар улууспут баһылыга Анатолий Григорьев бэйэтин эҕэрдэтин тириэрдэн туран, күрэстэһээччилэргэ ситиҺиини, кыайыыны-хотууну баҕарда. 🔹🔹Манна даҕатан эттэххэ, былырыын Бүлүү куоратыгар ыытыллыбыт спартакиадаҕа бүлүүлэр кыайыылаах буолан, көһө сылдьар Кубогы илдьэ хаалбыттара. Быйыл ол Кубоктарын аҕалан улуустааҕы бэтэрээннэр сэбиэттэрин бэрэссэдээтэлэ Афанасий Васильевка туттардылар. Быйылгы Х Спартакиада кыайыылааҕа ханнык улуус хамаандата буолан, Кубогы күөрэччи көтөҕөр? 🔹🔹Күрэсчиттэргэ кыайыыны, кылаабынай судьуйа Афанасий Жараев хамаандатыгар ситиһиилээх үлэни баҕарабыт. ✍️Яина ВЛАСЬЕВА