ХIурмат бусса жямат, ххирасса нину-ппу! — 3 сентября 2026 г. в 17:02:21.543
ХIурмат бусса жямат, ххирасса нину-ппу! 🔻КIулшивурттал кьини нагу уссияв зущал кIидачIлай цалчинсса занг рищаврил ххаришиву. Цалчинмур классравун нанисса оьрчIал чанна лавхъсса яру ххал шайхту, цIухлай ивкIра кIулну бурив вайннан лакку маз. ЯхI гъавгъун ливчIунна, чIявуми оьрчIан къакIулну лявкъукун. 🔻Ва щала миллатрал ялун нанисса балари, леххаву рутансса ишри. Жура руцан ритлай буру никирттал дянивсса дахIаву дарзун диркIсса ххал. Мазралли ядайсса миллатрал дакIгу, аьдатругу, аслийшивугу жунна кьариртсса. 🔻Аьщуйн щуну учин ччимур вари: ниттил маз ичIувари лахьлан аьркинсса. Школалул, анжагъ, кIулшивур дуллалисса, ниттил мазрахсса ччаву тIурча кулпатравур татлатисса. ЦукунчIавсса дарсирдал къабугьантIиссар оьрчIал ичIува нитти-буттащал ссупралух буллалисса гъилисса ва нахIусса гъалгъалул, шанух дуккайсса саннардал ва магьрал. Шаппа гьарца кьини баллалисса ихтилат бакъахьурча, оьрчIан му ххира къахьунтIиссар. 🔻Ва тагьар чIалай, анавархъиндарай детсадирттал каялувчитал бавтIун, вайннал хьхьичI бишав кьянкьасса мурадру: идаралул вив лакку мазрай гъалгъа тIун цащала цивппагу, оьрчIащалгу. Жува буржлувссару оьрчIащал лакку мазрай гъалгъа тIун. ТIуркIурдайхчил ва балайрдайхчил миннан лакку маз лахьхьин буллан. Ва жула аьмсса мурадри. Амма так ца педагогтурая тIалав буллай, масала щаллу къахьунтIиссар. 🔻На оьвтIий ура зуйн гьарцаннайн, ххирасса нину-ппу! Азарвагу миннатри! Кьюкьала мабизларду зула оьрчIащал лакку мазрай гъалгъа тIун! Гьалгъа тIутIияра ужагърай ниттил мазрай! БувчIин буллалияра гьарца мукъул мяъна. Гьарца кьини ичIува сагъсса гъалгъалулли маз бивчIан къабитантIисса. Маз сагъссакссар миллатгу сагъсса. Маз бухлаган битарча, жувагу тарихрава бухлаглагиссару. Бачияра хIакьинува байбишиннуча жула ужагъирттай лакку мазрай гъалгъа тIий! ХIурматращал ва умудращал Лакрал райондалул бакIчи Зураб Куччаев.