"Тыыннаах тыл" уһуйаан улуу Ойуунускай балаҕаныгар олоҥхонон түмүктэннэ!
"Тыыннаах тыл" уһуйаан улуу Ойуунускай балаҕаныгар олоҥхонон түмүктэннэ! Оҕо айымньытын дыбарыаһын иһинэн тэриллибит "Тыыннаах тыл" сайыҥҥы оҕо сынньалаҥын 10 күннээх уһуйаана бэрт сэргэхтик үлэлээн түмүктээтэ. Түмүктүүр үөрүүлээх тэрээһин П.А. Ойуунускай аатынан литературнай музей балаҕаныгар ураты чаҕылхайдык буолан ааста. Оҕолор "Дьулуруйар Ньургун Боотур" олоҥхоттон быһа тардыыны дьон кутун-сүрүн тутан, олус итэҕэтиилээхтик толорон көрдөрдүлэр. Былыргы балаҕан иһэ чахчы олоҥхо алыптаах эйгэтинэн сырдаата! Бу кылгас эрээри олус баай ис хоһоонноох уһуйааҥҥа уопсайа 17 оҕо дьарыктанна. Манна уһуйааччынан үлэлээтилэр, Попова М.П., Ермолаева Е.Е., Романова Л.А. Уон күн устата төрүт тыл сүмэтигэр уһуйуллан, төрөөбүт тылбыт дириҥ кэрэтин иҥэринэн, олус элбэх билиини-көрүүнү ылынан бардылар. Оҕолор саҥа таһымҥа тахсыбыттарын көрөн, төрөппүттэр уһуйаан иитээччилэригэр уонна тэрийээччилэригэр дириҥ махталларын биллэрдилэр. Тэрээһин үөрүүлээх чааһыгар Оҕо айымньытын дыбарыаһын дириэктэрэ Т.И. Иванова оҕолору эҕэрдэлээтэ уонна анал туоһу суруктары, сахалыы ааҕар кинигэлэри үөрүүлээх быһыыга-майгыга туттарда. Тэрээһиммитин өйөөн, сылаас ыалдьытымсах сыһыанынан көрсүбүт П.А. Ойуунускай аатынан литературнай музей айар кэллэктиибигэр барҕа махталбытын тиэрдэбит! Сахабыт тылын, култууратын сайыннарар үтүө дьайыыбыт өрүү бииргэ ситимнэнэ турдун! Оҕолорбут уһуйаантан ылбыт сырдык өйдөбүллэрэ кэскиллээх суолларыгар өрүү тирэх буолуохтун!
Канал в каталоге Максиметера
178 подписчиков · Госорганы и учреждения