Бөгүн май 21-де "Угулза" уруглар садының улуг болгаш школага белеткел бөлүктериниң эр-х... — 21 мая 2026 г. в 10:34:05.097
Бөгүн май 21-де "Угулза" уруглар садының улуг болгаш школага белеткел бөлүктериниң эр-хиндиктиг чаштарының болгаш оларның ачаларының аразынга Тыва Республикада Тургузукчу күш-ажылдың болгаш өг-бүле ыдыктарының чылынга тураскаадып, база ол ышкаш эр кижиниң мөзү-бүдүжүн хевирлээр, чылгы малга сонуургалын оттурар сорулгалыг "Чылгычының өө" деп фестиваль-маргылдаа болуп эрткен. Эр кижи тос кулаш сыдымның ээзи болур дижир. Эрес-дидим, аваангыр-кашпагай кылдыр, төлептиг аажы-чаңга оол уругну бичиизинден-не кижизидеринге ада кижи кончуг улуг салдарлыг. Ынчангаш "Кижи болуру чажындан, аът болуру кулунундан" деп үлегер домакта дег оол уругну чажындан тура-ла мөзү-бүдүштүг, ажыл-ишчи, төрээн чуртунуң төлептиг кижилери болур кылдыр белеткээри ада кижиниң дорт хүлээлгези. Фестиваль-мөөрей "Чылгычының өөн тигери", "Аът шалбадаары", "Аът чарыжы", "9 кулаш сыдым дүрери" деп дөрт аңгы маргылдаа шөлчүгежинден тургустунган. Фестиваль-мөөрейге аалдап келген хүндүлүг аалчывыс Тывада болуп эртип турар "Сыдым байырлалы" деп төлевилелдиң үндезилекчизи Ланаа Кур-Дагба Хорлай-оолович маргылдааның кол шииткекчизи болган. Ол ышкаш "Тываның үндезин культура төвүнүң" специализи Сат О. В., Тываның национал школа хөгжүдер институттуң специалистери Монгуш А. А., Хомушку А. В., Конзай К. К. база садиктиң адалар чөвүлелиниң кежигүннери аалдап келгеш, маргылдаага улуг үлүг-хуузун киириштирген. Ниитизи-биле улуг болгаш школага белеткел бөлүктерден 20 чаштар, 20 адалар бөлүктер аайы-биле маргылдааларга киришкен. Оларның аразындан 🌟I-ги черге "Оюу", 🌟II-ги черге "Алдын", 🌟III-кү черге "Мөңгүн" 🌟IV-кү черге "Чадыр-Хээ", 🌟V-ки черге "Чесчигеш" бөлүү төлептиг болганнар. Ол ышкаш "Оккур сыдымчы", "Кашпагай сыдымчы", "Тергиин аът мунукчузу" деп номинацияларга кезек адалар төлептиг болган. Тыва чоннуң амыдыралында онзагай черни ээлеп чоруур чылгычы кижиниң ажыл-амыдыралы, чылгы малдың дериг-херекселдери хоорай черде өзүп орар чаштарга сонуурганчыг болган. #ЧЫЛГЫЧЫНЫҢӨӨ🐎🐎🐎