"Туллукчаан" уһуйаан орто бөлөҕүн нэдиэлэтээҕи тиэмэтэ *"Кэтэх хаһаайыстыба"*.
"Туллукчаан" уһуйаан орто бөлөҕүн нэдиэлэтээҕи тиэмэтэ *"Кэтэх хаһаайыстыба"*. Ол чэрчитинэн, Авелия Калачикова ,Коля Саввинов өрөбүл күннэригэр ытык- мааны эбээлээх эһээлэрин кэтэх хаһаайыстыбаларыгар ыалдьыттаан дьиктилээх арыйыылары кэпсээтилэр. Арсентий Саввинов уонна Түмэн Поскачин сайын устата кырачаан отчут бэрдэ буолбуттарын сырдаттылар. Оҕолор төрөппүттэрэ таӈан оӈорбут үөрэтэр хабааннаах видеосюжеттарын кырачааннар сүр болҕойон олорон көрдүлэр, иһиттилэр.Биир саастыылаахтара кэтэх хаһаайыстыбаҕа хайдах курдук сыстаҕастарын, тугу үлэлииллэрин көрөн элбэҕи биллилэр, иӈэриннилэр. Кырачаан үлэһиттэр холобурдара: - Авелия далга турар ынахтары,кууруссалары, кустары астына аһатта.Кыыллары хайдах көрөр- харайар, таптыыр- аһынар наадатын көрдөрдө. - Коля уол эһээтэ хотону сыбыырын, сүөһүлэрин отунан аһатарын, ынаҕы кыаһылааһынын уонна ыаһынын көрө сылдьан олус судургутук, өйдөнүмтүөтүк тугу көрбүтүн быһаарда. Аны туран, ыаммыт үүттэрин дьиэлэригэр киллэрэн, сэппэрээтэрдээн сүөгэй тахсарын көрдөрдүлэр. Түөрт саастаах Коля сэппэрээтэри бэрт сатабыллаахтык таҥарын көрөн сөхтүбүт,киэн тутта биһирээтибит. - Арсентий халыӈ аймаҕын кытта оттуурун, от үлэтин хаамыытын, отууга сынньалаӈы сырдатта. От үлэтэ төһө күргүөмнээх, сонун буоларын кэпсээтэ. - Түмэн аҕатын кытта тэбис- тэӈӈэ кыраабыл тутан от харбыырын сэӈээрэ көрдүбүт.Кырачаан оҕо төһө кыһамньылаахтык үлэлиирэ барыбытын үөртэ. Бу курдук, оҕолор дьонноро үлэҕэ үтүө холобурдарын көрөннөр, кыттыһан кэтэх хаһаайыстыба үлэтигэр бастакы дьаһаллары баһылаатахтара. Итинник туһалаах өрөбүллэр, үөрэтэр хабааннаах видеосюжеттар кэнчээри ыччат олоҕор суолталаах билиини, сатабылы бэрсэллэр, кинилэри үлэни таптыырга үөрэтэллэр.