🌿🌿🌿 Мичил уһуйаан оҕолоро – сайылыкка! Төрүт үгэһи тилиннэрэр, чөл олоҕу көҕүлүүр тэ... — 22 мая 2026 г. в 08:48:54.810
🌿🌿🌿 Мичил уһуйаан оҕолоро – сайылыкка! Төрүт үгэһи тилиннэрэр, чөл олоҕу көҕүлүүр тэрээһин🌿🌿🌿 Мичил уһуйаан оҕолоро уонна иитээччилэрэ, төрөппүттэрин кытта биир сүбэнэн, төрүт сахалыы үгэһи тутуһан, сайылыкка көһүү дьоро тэрээһинин бэлиэтээтилэр. Бу тэрээһин оҕолору айылҕаҕа чугаһатыы, төрүт үгэстэри үөрэтии, чөл олоҕу сиэрдээхтик туттуу сыалынан-соругунан сылын ахсын ыытыллар. Саҥа сайылыкка көһүүгэ анаан, аан бастаан алгысчыт алгыс тылын эттэ, ыраас ыраах санаатынан айылҕа дууһаларыгар сүгүрүйдэ. Салама быа ыйанан, иччилээх сир Айыылара кэскиллээх кэнэҕэскини арчылыылларыгар көрдөстүлэр. Бу сиэр-туом оҕолорго төрүт итэҕэли, айылҕаны ытыктааһыны өйдөтөргө улахан суолталааҕа. Оҕолор түөрт бөлөҕүнэн, бэйэлэрин «дьиэ кэргэттэринэн» олордулар: ол курдук, булчуттар, уустар, иистэнньэҥнэр уонна ырыаһыттар-тойуксуттар оҕолоро дьиэ кэргэн буолан, түһүлгэлээн олорон тэринэн, сахалыы минньигэс аһылыгынан күндүлэстилэр. Хас биирдии бөлөх бэйэтин дьарыгын кэпсээтэ. Ыаллаах оонньуу нөҥүө оҕолор төрүт дьарыктарбытын билэн-көрөн, кэскиллээх ыччат үүнэригэр улахан төһүү күүс буолар. Салгыы оҕолор Мичилбит эргэ тиэргэнин киэҥ хонуутугар, сүүрэн-көтөн, араас күрэхтэһиилэргэ кытыннылар. «Сүүрүү», «мас тардыһыы» араас көрүҥэ оҕолор доруобуйаларын бөҕөргөтөн, күүстэрин-уохтарын элбэтэргэ туһалаата. Оҕолор үөрэн-көтөн, айылҕаҕа сынньанан, күн уотугар күлэн-үөрэн оонньоотулар. Бу дьоһуннаах тэрээһин ситиһиилээхтик ааһарыгар биһиги күндү төрөппүттэрбит үгүс көмөлөрө, өйөбүллэрэ улахан суолталаах. Эһиги көмөҕүтүнэн, бу сайылыкка көһүү тэрээһинэ өйдөөн хаалар түгэннэринэн толору буолла. Сахалыы түһүлгэлээн олорууну тэрийииттэн саҕалаан, оҕолор күрэхтэһэллэригэр көмөлөһүүгэ тиийэ, барытыгар эһиги сыралаах үлэҕит көстөр. Барҕа махтал буоллун эһиэхэ! Бу курдук тэрээһиннэр оҕолорго төрүт култуураны иҥэрэн, айылҕаҕа тапталы үөскэтэн, чэгиэн-чэбдик буола улааталларыгар олук уураллар. Сайылыкпыт ыраас салгына, кэтит хонууга күрэхтэһии уонна төрүт үгэстэргэ олоҕуран ыытыллыбыт тэрээһиннэр оҕолор өйдөрүгэр-санааларыгар өр кэмҥэ умнуллубат үтүө өйдөбүлү хааллардылар.