Дьокуускай куоракка олус дьоһуннаах тэрээһин – норуоттар икки ардынааҕы кыттыылаах бүтү... — 8 июня 2026 г. в 01:17:17.474
Дьокуускай куоракка олус дьоһуннаах тэрээһин – норуоттар икки ардынааҕы кыттыылаах бүтүн Арассыыйатааҕы научнай-практическай "Педагогика детства: языки и культура в образовании" кэмпириэнсийэтэ ситиһиилээхтик ыытылынна. Бу кэмпириэнсийэ оҕо саас педагогикатын сүрүн кыһалҕаларын, тыл уонна култуура үөрэхтээһиҥҥэ оруолун дьүүллэһиигэ улахан былаһаакка буолла. Бу улахан таһымнаах кэмпириэнсийэҕэ биһиги "Ньургуһун" уһуйааммыт педагогтара кыттыыны ыллылар. Уһуйаан салайааччыта Татьяна Николаевна Ефремова "Этно-сувенир: Наследие-народа" диэн салааҕа үөрэх тэрилтэлэрин салайааччыларын ортотугар норуоттар икки ардынааҕы таһымнаах күрэххэ бочуоттаах 3 миэстэни ылары ситистэ! Татьяна Николаевна бу ситиһиитэ – саха норуотун төрүт култууратын, үгэстэрин үйэтитиигэ, кэнчээри ыччакка тиэрдиигэ улахан кылаат буоларын көрдөрөр. Ону таһынан, "Ньургуһун" уһуйаан педагогтара кэмпириэнсийэ араас хайысхалаах семинардарыгар көхтөөхтүк кыттыыны ыллылар. Кинилэр оҕо саас педагогикатын саҥа ньымаларын, тылы үөрэтии, култуураны иҥэрии туһунан билиилэрин хаҥаттылар, атын дойдулар уонна Арассыыйа эрэгийиэннэрин үлэһиттэрин уопуттарын үөрэттилэр. Бу – педагогтар идэлээх таһымнарын үрдэтэргэ, оҕолорго өссө туһалаах, интэриэһинэй дьарыктары ыытарга улахан көмө буолуоҕа. Маннык кэмпириэнсийэлэр биһиги өрөспүүбүлүкэбит үөрэҕириитин сайдыытыгар, саха тылын уонна култууратын чөл хаалыытыгар улахан суолталаахтар. "Ньургуһун" уһуйаан кэллэктиибин уонна салайааччытын ситиһиилэрэ – барыбытыгар холобур, кэнчээри ыччакка кэскиллээх суолу арыйар аартык буолаллар.