Уһуйаан иитээччилэригэр аналлаах сахалыы остуол оонньууларыгар семинар-практикум ыытылынна
Уһуйаан иитээччилэригэр аналлаах сахалыы остуол оонньууларыгар семинар-практикум ыытылынна Алтынньы 20 күнүгэр "Кэнчээри" уһуйааҥҥа Амма улууһун уһуйааннарын иитээччилэригэр аналлаах сахалыы остуол оонньууларыгар семинар-практикум буолан ааста. Иитээччи Оксана Сорокгодовна Кривогорницына көҕүлээһининэн, Амма улууһун үөрэҕириитин салалтата уонна Сахалыы төрүт остуол оонньууларын Федерацията өйөөннөр, «Кэнчээри» уһуйаан 2020 сыллаахтан быйыл 7-с төгүлүн оскуолаҕа киириэн иннинээҕи саастаах оҕолорго уонна уһуйаан үлэһиттэрин икки ардыгар сахалыы остуол оонньууларыгар (хабылык, иэрэгэй, тырыыҥка) өрөспүүбүлүкэтээҕи күрэх ыытар. Семинар тэриллибит сыала – сахалыы төрүт остуол оонньууларын уһуйаан саастаах оҕолорго үөрэтии ньымаларын билиһиннэрии, хабылык, иэрэгэй, тырыыҥка оонньуулар быраабылаларын чопчулааһын, күрэхтэргэ тахсар сыыһалары ырытыы, сахалыы остуол оонньууларын киэҥ араҥаҕа тарҕатыы. Семинарга барыта 16 уһуйаантан 26 иитээччи кыттыыны ылла. Кэнчээри уһуйаан иитиллээччилэрэ «Хабылык» диэн ырыанан, сахалыы остуол оонньууларын туһунан хоһооннорунан кэлбит ыалдьыттары эҕэрдэлээтилэр. Амма улууһун үөрэҕириитин салалтатын специалиһа Эмма Валерьевна Давыдова семинар кыттыылаахтарыгар остуол оонньуулара оскуолаҕа киириэн иннинээҕи оҕону сахалыы иитиигэ, оҕо сайдыытыгар суолталарын туһунан кэпсээтэ. Семинар сүрүн чааһыгар Оксана Сорокгодовна күрэх быраабылаларын, күрэхтэргэ тахсар сүрүн сыыһалар-халтылар тустарынан сырдатта, онлайн ыытыллар күрэххэ – видео-устууга сүбэлэри биэрдэ. Ол кэннэ, сахалыы остуол оонньууларын спордун маастарыгар кандидат, Манчаары оонньууларын кыайыылааҕа Николаева Татьяна Терентьевна хабылыкка уонна иэрэгэйгэ маастар-кылаас көрдөрдө, иитээччилэр мунаарар боппуруостарыгар хоруйдаата, сүбэ-ама биэрдэ. Иккис кыттааччы, Кэнчээри уһуйаан иитээччитэ, Осипова Зоя Афанасьевна тырыыҥкаҕа маастар-кылааһын көрдөрдө, оонньуу быраабылаларын, үлэтин уопутун кэпсээтэ. Маастар-кылаастар кэннэ, семинарга истибит билиилэрин бигэргэтэр сыалтан, иитээччилэр икки ардыларыгар үс көрүҥҥэ табаарыстыы көрсүһүү тэрилиннэ. «Иэрэгэйгэ бастыҥ» ааты ылла - Бөтүҥнээҕи «Мичээр» ОСК иитээччитэ Иванова Мария Ильинична, «Тырыыҥкаҕа бастыҥ» ааты ылла – Сатаҕайдааҕы Готовцева аатынан ОСК иитээччитэ Давыдова Любовь Николаевна, «Хабылыкка бастыҥ» ааты ылла - Бөтүҥнээҕи «Мичээр» ОСК иитээччитэ Никитина Елена Спиридоновна. Бары кыттааччылар туоһу суруктары туттулар. Саха оҕото сахалыы сайдарыгар хас биирдии уһуйаан иитээччитэ сахалыы остуол оонньууларын сатыыр буоларга сыал туруорунарыгар, оҕоҕо эрэ буолбакка, төрөппүтү эмиэ үөрэтиэххэ, уһуйааннарынан күрэхтэри ыытыахха наадалаах диэн, Эмма Валерьевна баҕа санаатынан семинары түмүктээтэ. Васильева Ю.Н., “Кэнчээри” ОСК сүрүннүүр иитээччитэ.