МБДОУ "Детский сад №9 "Сардана" с.Дюпся" МР "Усть - Алданский улус (район)" РС (Я)
Образование · 9 января 2026 г.
🎊 Саха АССР VI ыҥырыылаах Киин Ситэриилээх Кэмитиэтин иккис сессиятын 1930 сыл тохсунн... — 9 января 2026 г. в 01:10:57.171
🎊 Саха АССР VI ыҥырыылаах Киин Ситэриилээх Кэмитиэтин иккис сессиятын 1930 сыл тохсунньу 9 күнүнээҕи уурааҕынан республикаҕа аан бастаан тэриллибит биэс оройуонтан биирдэстэринэн Уус Алдан этэ. Аллан Төрдө оройуонугар Бороҕон улууһун 14 нэһилиэгэ: I, II Бэрт Ууһа, I, II Курбуһах, I, II Лөгөй, I, II Өлтөх, I, II Суотту, Сыҥаах, Хоро уонна Саһылыкаан; Дүпсүн улууһун 8 нэһилиэгэ: Баатаҕай, Найахы, Өнөр, I, II Өспөх, Тэбиик, Түүлээх, Чэриктэй; Байаҕантай улууһуттан I, II Байаҕантай, Тандинскай нэһилиэктэрэ хаалбыттара. Араас кэмҥэ уонна араас сылтаҕынан икки Курбуһах, икки Бэрт Ууһа холбоһоннор биир нэһилиэк буолбуттара. Сыҥаах, Саһылыкаан, Тандинскай, I Өспөх нэһилиэктэрэ атын нэһилиэктэргэ холбоммуттара. Тэбиик нэһилиэгэ Дүпсүн, II Суотту нэһилиэгэ Бороҕон нэһилиэктэрэ диэн ааттаммыттара. Улуус киинигэр Мүрү нэһилиэгэ тэриллибитэ. Уус Алдан улууһа билигин республикаҕа тыа хаһаайыстыбатынан дьарыктанар 21 нэһилиэктээх биир улахан улууһунан буолар. Оройуон тэриллибит бастакы сылларыттан Уус Алдан дьоно-сэргэтэ олохтообут үтүө үгэстэрэ – мэлдьи инники, мэлдьи бастыҥнар инники кирбиилэригэр тахсар үрдүкү сыал-сорук тула ыга түмсүү. Оннук этэ. Оннук буолуо да турдаҕа. Ону аҕыйах тылынан бигэргэттэххэ, оройуон саҥа тэриллибит 30-c сылларыгар колхознай тутул саҥардыы оннун-олоҕун булан эрдэҕинэ уус алданнар Саха сиригэр бастакынан Бочуот Бэлиэтэ уордьаннаах икки бастыҥ дьоннонон, «Үлэ Геройа» грамоталаах киһилэнэн аар-саарга аатырбыттара. Аҕа дойду Улуу сэриитигэр 10-нан албан аатырбыт буойуннарыттан икки Герой үрдүк аатынан бэлиэтэммиттэрэ. Олоҕу чөлүгэр түһэрии сылларыгар уонна 70-c, 80-c сылларга икки Социалистическай Үлэ Геройа, икки Үлэ Албан Аата уордьан толору кавалера үүнэн тахсыбыттара элбэҕи этэр. Үтүө утум салҕанан 2014 сыллаахха үлэ үөскэппит Маяга М.Н. Готовцев Саха сиригэр, Уһук Илин уокуругар эрэ буолбакка, Бүтүн Россия аграрнай секторын сүөһү иитиитигэр салаатын үлэһиттэриттэн бастакынан Россия Үлэҕэ Геройа үрдүк аакка, чиэскэ-бочуокка тиксиитэ ааспыт сылларга үлэлээн-хамсаан Уус Алданы ааттаппыт удьуор харылы үлэһитэ, Герой дьон утумнара саҥа үйэҕэ салҕанар чаҕылхай туоһута буолбат дуо?! Кыларыйар кырдьык кыайан, уоттаах сэрии сылларыгар кыргыһыы толоонугар көрдөрбүт хорсун быһыыта сыаналанан буойун М.М. Стрекаловскай саҥардыллыбыт Россия Геройун үрдүк аатын саха дьонуттан бастакынан ылыыта, онтон анал байыаннай дьайыы кыттыылааҕа, аатырбыт-сураҕырбыт «Алеша» тааҥка экипаһын чилиэнэ Алексей Неустроев эмиэ Россия Геройа буолуута – "биһиги тоҕус Геройдаах уус алданнарбыт" диэн дорҕоонноохтук киэн туттар бырааппыт, чиэспит. Быйылгыттан 2030 сылга улууспут төрүттэммитэ 100 сылын киэҥ далааһыннаахтык бэлиэтииргэ бэлэмнэнии саҕаланыаҕа. Онуоха бастакы олуктар уурулланнар, номнуо ааспыт сыл бүтүүтүгэр үлэ хамыыһыйата тэриллэн, үбүлүөйдээх тэрээһиннэр концепциялара оҥоһуллан бигэргэтилиннэ, мантан инньэ ол тула, ол иитинэн тэрээһиннээх, түмсүүлээх, өрө көтөҕүллүүлээх үлэ-хамнас ыытыллыаҕа. 🌐 мюрюгазета.рф ✅ @uamurusahargata @ulusmedia