🌱 «Арбай-Хоор»: чайгы школага кажык-биле ойнаарыныӊ мастер-клазы болган — 28 июня 2026 г. в 00:23:57.981

🌱 «Арбай-Хоор»: чайгы школага кажык-биле ойнаарыныӊ мастер-клазы болган Тываныӊ күрүне университединде ажыттынган «Арбай-Хоор» деп чайгы школага Национал школа хөгжүдер институттуӊ ажылдакчызы Азияна Саая четкеш, уругларга тыва улустуӊ оюну – кажык-биле ойнаарыныӊ мастер-клазын эрттирген. Уруглар кажыктың аът чарыштырар хевирин идепкейлиг ойнааннар. Ниитизи-биле 14 уруг киришкен. Кажык – тыва чоннуң шаандан тура адааннажып ойнаар, солун, чараш оюннарының бирээзи. Бистиң ада-өгбелеривистен дамчып келген кажык оюну бичии салгалдарны кижизидеринге, оларның угаан-медерелин, холунуң шимчээшкинин сайзырадырынга ужур-дузалыг. Эрткен чылын чайгы школага болган мастер-класска өөренип турган уруглар бар болган. Сөөлгү үеде ажы-төлдүң тыва оюннарга сонуургалы оттуп турары ɵɵрүнчүг. «Арбай-Хоор» деп чайгы школаныӊ удуртукчу башкызы Шенне Азыраа уругларныӊ төрээн дылынга чугаазын сайзырадырынга тыва улустуӊ оюннары улуг ужур-дузалыг дээрзин демдеглээн.