🔹 Владислав Ховалыг хөлдер болгаш хемнер кыдыынга дыштанып тургаш, кончуг кичээнгейлиг...

🔹 Владислав Ховалыг хөлдер болгаш хемнер кыдыынга дыштанып тургаш, кончуг кичээнгейлиг болурун чаңгыс чер чурттугларындан социал четкилер таварыштыр дилээн. Суг объектилеринде өлүмнүг болуушкуннарның саны көвүдээни аңаа чылдагаан. Онза байдалдар яамызының регионалдыг эргелелиниң дыңнадып турары болза, чыл эгезинден бээр Тывада 6 кижи сугга дүшкен, ооң 3-ү – чаштар. Айыыл-халаптарның чылдагааннары чаңгыс – бодунуң айыыл чок чоруунга харыысалга чогу болгаш серемчилел чогунда деп, республика Баштыңы айыткан. «Эзирик кажанда-даа сугже кирбеңер, уругларны чаңгыс-даа минута хайгаарал чок арттырбаңар, бодуңарның шыдалыңарны таптыг боданып көрүңер» - деп, ол сугга айыыл чок чоруктуң кол дүрүмнерин сагындырган. Бо бөдүүн болгаш билдингир дүрүмнерни хөй-ле улус уттуп алыр. Ооң бадыткалы – Кызылгаа 12 харлыг ийи уругнуң чок болганы, база бир элээди уруг улуг улустуң хайгаарыл чокка бодунуң үе-чергези эштери-биле эштип турган. Шак-ла ындыг байдалда база ийи назы четпээннер сугга дүже бергенде, камгалап алганы – аас-кежиктиг таварылга. Тываның Баштыңы чогуур ведомстволар болгаш муниципалдыг чагыргалар удуртукчуларындан сугларга болгаш эштир черлерге патрульдаашкынны күштелдирерин негээн. «Рейдтерже үнүп, чон-биле профилактиктиг ажылды күштелдирерин негеп тур мен. Бо угланыышкынга контроль шыңгыы болур ужурлуг» - деп, ол сагындырган.