💥Август 17-де база ужудуушкуннар катаптаар — 16 августа 2026 г. в 04:12:32.913
💥Август 17-де база ужудуушкуннар катаптаар 📣Август 15-те, Республика хүнүнде, "Орус Витязтар" Россияның Шериг-агаар күштериниң дээди пилотажының ужар бөлүүнүң ужудукчулары Тываның чурттакчыларынга болгаш аалчыларынга онзагай ужудуушкуннарны көргүскен. Ниитизи-биле 11 ужудукчу Тывада келген. Ол чүгле белеткел ужудуушкуннар дээрзин ужар бөлүктүң төлээзи дыңнаткан. Август 17-ниң хүнүнде база ужудуушкуннарны көргүзерлер. "Тываның дээри кайгамчык чараш болгаш онзагай-дыр. Бистиң бөлүүвүс хөй-хөй девискээрлерге ужуп, географтыг точкаларны ажыткан. Тыва биске база бир чаа географтыг точка болуп турар" — деп, "Орус Витязтар" бөлүүнүң төлээзи чугаалаан. Белеткел ужудуушкуннар үезинде агаар-бойдус таарымчалыг болганын ол демдеглээн: "Бис ужуп келиривиске, ында-мында мөөң булуттар турда, а хоорай кырында хүннүң чырып турганы кайгамчык чараш болду. Кол-ла чүве агаар эки болган. Август 17-ниң хүнүнде база эки болурунга идегеп тур бис". Ужудуушкуннар үезинде дендии хөй хевирлерни көргүскен. Бо удаа ужудуушкуннар оожум болза-даа көрүкчүлерни олар канчаар-даа аажок кайгатканнар. 17-де ужудуушкуннарның хевирлери хевээр артса-даа, оон-даа дүрген болгаш солун болурун ужудукчулар дыңнаткан. Шак ындыг тускай ужудуушкуннар кылырынга шыңгыы белеткелдер, арга-дуржулга, корум-чурумну сагыыры, үргүлчү бердинип ажылдаары, бүгү чүүлдү хыналдага ап билири негеттинер. Кажан ужар-хемелерниң аразы 1-ден 3 метр турда, кончуг кичээнгейлиг болур. Ынчангаш бүгү-ле билиглерни, аргаларны чыып, салган сорулганы хей-аът көдүрлүүшкүннүг кылыр апаар дээрзин ужудукчулар демдеглээн. Москвадан Кызылче кээрде олар Новосибирскиге чедир 3 шак чартык ушкаш, дараазында ужудуушкунга белеткенип алгаш, Кызылга чедир 2 шак ушканнар. Ниитизи-биле Кызылга чедир 5 хире шак ужутканнар. Чыжыргана СААЯ. Ада Тюлюштуң тырттырган чуруктары база видеолары.