Соңгулдалар кампаниязы эгелээн — 24 июня 2026 г. в 06:35:51.519
Соңгулдалар кампаниязы эгелээн 2026 чылдың сентябрь 20-де болуп эртер соңгулдаларга уткуштур соңгулдалар кампаниязының хоойлу ёзугаар хуусаазы келгени-биле холбаштыр Тыва Республиканың Соңгулда комиссиязының даргазы Адыгжы Доңгак республиканың массалыг информация чепсектеринге парлалга конференциязын июнь 18-те эрттирген. “Россия Федерациязының Федералдыг Хуралының Күрүне Думазының чаа чыыжының депутаттарының соңгулдаларын томуйлаар дугайында” Россияның Президентизи Владимир Путинниң Чарлыы ёзугаар Күрүне Думазының чаа чыыжының депутаттарының соңгулдаларын 2026 чылдың сентябрь 20-де эрттирер деп доктааткан. Президентиниң чарлыын Хоойлу-дүрүм информациязының албан ёзузунуң порталында 2026 чылдың июнь 16-да парлаан, ынчангаш Россия Федерациязының Федералдыг Хуралының Күрүне Думазының чаа чыыжының депутаттарының соңгулдаларының кампаниязы ол хүнден эгелээн дээрзин Тыва Республиканың Соңгулда комиссиязының даргазы Адыгжы Доңгак дыңнаткан. 2026 чылдың сентябрь 20-де Тыва Республиканың девискээринге федералдыг, республика болгаш муниципалдыг деңнелдиң соңгулдалары болуп эртерин Адыгжы Доңгак чугаалааш, олар дээрге Күрүне Думазының депутаттарының, Тыва Республиканың Баштыңының, Сүт-Хөл кожуунда чаңгыс мандаттыг округтан Тыва Республиканың Дээди Хуралының (парламентиниң) депутадының болгаш тус черлерде төлээлекчи эрге-чагырганың муниципалдыг органнарынга 61 депутаттың соңгулдалары болур деп тодараткан. Ол соңгулдаларны эрттирер дугайында Тыва Республиканың Дээди Хуралының (парламентиниң) доктаалын 2026 чылдың июнь 18-те массалыг информация чепсектеринде парлаан, ынчангаш июнь 18-тен Тыва Республиканың Баштыңының, ТР-ниң Дээди Хуралының депутадының болгаш муниципалдыг деңнелдиң депутаттарының соңгулдаларының соңгулда кампаниязы эгелээн деп Адыгжы Доңгак чугаалаан. Парлалга конференциязынга келген журналистерниң соңгулдаларны эрттирериниң чурумунга хамаарыштыр айтырыгларынга Тыва Республиканың Соңгулда комиссиязының даргазы Адыгжы Доңгак харыылап, тайылбырларны кылган. / Ш. МОҢГУШ. Буян ООРЖАКТЫҢ тырттырган чуруу. “Шын” №24 2026 чылдың июнь 25 "Шын" солуннуң МАХ-каналынга каттыжыңар: max.ru/join/egenQ...