Күндү выпускниктар, учууталлар уонна төрөппүттэр! — 26 мая 2026 г. в 07:55:02.933
Күндү выпускниктар, учууталлар уонна төрөппүттэр! Эһигини "Сунтаар улууһа (оройуона)" муниципальнай оройуон дьаһалтатын, улуус дьокутааттарын Сэбиэтин уонна тус бэйэбит ааппытыттан Тиһэх чуораан бырааһынньыгынан итиитик-истинник эҕэрдэлиибит! Бүгүн улуус оскуолаларыгар тиһэх чуораан чугдаарда. Бары үөрэнээччилэргэ, оскуола коллективтарыгар уонна төрөппүттэрбитигэр долгутуулаах күн үүннэ. Тиһэх чуораан бырааһынньыга – хас биирдии выпускник олох киэҥ аартыгар үктэнэр кэрэ-бэлиэ түгэнэ буолар. Бу күн оскуолаҕа, учууталларга, төрөппүттэргэ махтал күнэ. Оскуолатааҕы сыллар – киһи үйэтин-сааһын тухары умнубат, сырдык өйдөбүлү саҕар кэрэ кэм. Киһи буолуу, саха буолуу барыта манна төрүттэнэр, төрөөбүт дойдуга, Ийэ Сиргэ, бар дьоҥҥо таптал манна саҕыллар, дьоһун дьон буолан кэрэ олоҕу олорор баҕа санаа манна иитиллэр. Сунтаар улууһугар быйыл 290 выпускник оскуоланы бүтэрэр, олор истэригэр сыллата предметнэй олимпиадаларга, научнай-практическай конференцияларга, "Профессионаллар" чемпионаттарыгар ситиһиилээхтик кыттан, спорт араас көрүҥнэригэр дьарыктанан, айар сатабылларын сайыннаран араас таһымнаах күрэхтэргэ кыайыы-хотуу кынаттанан улуустарын аатын дорҕоонноохтук ааттаппыт киэн туттар выпускниктарбыт. Убаастабыллаах учууталлар! Эһиэхэ таһаарыылаах үлэҕит, кэлэр көлүөнэ ыччакка тиэрдибит билиигит, сатабылгыт, сүрэххит сылааһын иһин махтанабыт. Эһиги түстээбит кэскилгит кэнчээрилээх буоллун, арыйан биэрбит аартыккыт аһаҕас буоллун! Күндү выпускниктар! Биир кэлим экзаменнаргытын ситиһиилээхтик туттараҥҥыт, талан ылбыт идэҕитин баһылаан, үчүгэй үлэһит буолан тахсыаххыт, дойдугут Сунтаар аатын доргуччу ааттатыаххыт диэн олус эрэнэбит. Эһиги иннигитигэр Аан Ийэ дойду арыллан турар, олор, үлэлээ, ай-тут, аныгы саха ыччата, тус бэйэҕитигэр саҥа дьикти кэрэхсэбиллээх суолгутун арыйан, куруук иннигит диэки хардыылаан иһин, саҥаттан саҥа үрдэлгэ дабайыҥ! Ытыктабыллаах төрөппүттэр! Күн сирин көрдөрөн, кыра бэйэлэрин бүөбэйдээн, иитэн-үөрэтэн, улаатыннаран таһаарбыт оҕолоргут дьиэ-кэргэнтэн, оскуолаттан куорсун анньынан көтөр кэмнэрэ кэллэ. Оҕолоргутугар эрэниҥ, ыраас санааҕытынан, истиҥ сыһыаҥҥытынан, ийэлии-аҕалыы тапталгытынан кинилэри араҥаччылыы-арчылыы туруҥ! Тиһэх чуораан күнүнэн өссө төгүл эҕэрдэ! Сунтаар улууһун баһылыга А.В. Григорьев Улуус дьокутааттарын Сэбиэтин бэрэссэдээтэлэ У.Д. Попова