Амгы үеде тыва дылды өөредириниң аргаларының дугайында билиг бедидер курстар — 27 сентября 2026 г. в 05:33:39.908
Амгы үеде тыва дылды өөредириниң аргаларының дугайында билиг бедидер курстар Сентябрьның 23-25 хүннеринде Национал школа хөгжүдер институт уруглар садтарының башкыларынга билиг бедидер курстарны эрттирген. Хемчегниң кол сорулгазы школа назыны четпээн уруглар өөредилгезиниң Федералдыг өөредилге программазының негелделеринге дүүштүр тыва дыл кичээлдерин эрттирериниң чамдык арга, методтарын уруглар садтарының башкыларынга таныштырары. Өөредилгениң баштайгы хүнүнде дыңнакчыларга Тыва Республиканың Өөредилге яамызының ниити өөредилге эргелелиниң специализи. Урана Допул байыр чедирип сөс алган. Школа назыны четпээн уруглар өөредир албан черлериниң ажылдакчыларының билген турары эрге-хоойлу талазы-биле доктаал-саавырларга доктаап, амгы үеде тыва дылды өөредиринге хамаарышкан чидиг айтырыгларны шиитпирлеп болур арга, методтарны институттуң директору Елена Куулар сүмелээн. Кожууннарның школа назыны четпээн уруглар албан черлериниң кижизиттирикчилериниң тыва дылды билириниң деңнелин тодарадыры-биле чоруткан диагностиканың түңнелдерин, чаарттынган ажылчын кыдырааштар-биле ажылдаарының арга, методтарын тыва филология лабораториязының эргелекчизи Альбина Монгуш таныштырган. Өөредилгениң практиктиг кезээнде уругларга тааржыр мультфильмни кылып тургузарын, видеонуң маадырларын шимчедир, үнүн бижидер болгаш өске-даа аргаларны компьютер графиказының талазы-биле ажылдап турар Сергек Чапчынның кичээлинге эге билиглерни шиңгээдип алгаш, бо талазы-биле аңгы курстарны ноябрь айда эрттирерин дугурушкан. Тыва улустуң национал чемнерин өөредип тура, уругларның тыва чугаазын сайзырадып болур аргалары-биле «Башкы» журналының редактору Азиана Ондар үлешкен. Башкыларга тыва чемни өөредириниң дугайында кичээл планнарындан тургускаш, ук журналче чорудар онаалганы берген. Методика талазы-биле болгаш тыва дылдың чараш аргаларын ажыглап тургаш бижээн ажылды журналдың 4-кү үндүрүлгезинге парлаар деп дугуржулганы кылган. Өөредилгениң ийи дугаар хүнүн башкыларның бот-боттарының арга-дуржулгазын солчурунга тураскааткан. Башкылар «Чаңгыс дыл – чаңгыс башкы» деп принципти боттандырып турар арга-дуржулгазы-биле Мугур-Аксы суурунуң «Сайзанак» аттыг уруглар садының эргелекчизи Елена Саая солун дыңнадыгны кылган. Тыва филология лабораториязының ажылдакчылары Аңчы Хомушку бичии уругларның аас чогаалының онзагайы, Регина Монгуш уруглар сады биле школаның аразында үре-түңнелдиг ажылдап турарын таныштырган. Тес-Хем кожууннуң Самагалтай суурунуң «Аян» аттыг уруглар садының тыва дыл башкызы «Тергиин тыва дыл болгаш чогаал башкызы» деп регионалдыг мөөрейниң «Школа назыны четпээн уругларның төрээн дылын сайзырадырынга шылгараан практик башкылар» деп номинацияга тиилээш, Россия чергелиг мөөрейге Тыва Республиканы төлээлеп чораанының дугайында Аянмаа Эренчин солун ужуралдарын чугаалап берип, амгы үениң чаа арга, методтарын ажыглап турганының дугайында сонуургаткан. Өөредилгениң тускай болган, уттундурбас чүүлү – амгы үеде презентацияларны белеткээринге он беш негелделерни сагыырының, бодун шын алдынарының дугайында дыңнадыгны Россияда «Знание» аттыг ниитилелдиң илеткекчизи Хандымаа Шагдыр номчаан. Ниитизи-биле билиг бедидер курстарны республикадан келген башкылар бедик деңнелде эртип турар деп түңнээн. #ИРНШ #НШХИ #ЛТФ #КПКДОО #МинобрТува #годдошкольногообразованиятыва