МБОО Туора-Кюельская СОШ имени Ивана Николаевича Гуляева
Образование · 26 мая 2026 г.
*"Оҕо саас өрүү сүрэхпитигэр"* — 26 мая 2026 г. в 12:29:29.829
*"Оҕо саас өрүү сүрэхпитигэр"* Үйэлэр үөмэхтэһэр былыттарын анараа өттүгэр дьоҕус бэйэлээх Дьүлэй нэһилиэгин кэскиллээх кэмнэрин аар саарга аатырбыт дорҕоон дьаҥсал олоҥхоһуттар ойуулаан , оһуордаан этэн- тыынан хаалларбыттара. Оччугуйкаан бэйэлээх Тордохтоох алааска бастакы оскуола оҕолорго аанын аспыта. 1966 сыллаахха орто оскуола бастакы хараҥаччылара, Туора- Күөл уолаттара, кыргыттара оскуолаларын кытта быраһаайдаһан улахан олох устун айаҥҥа туруммуттара. Ол сааскы сайаҕас күнтэн ыла 60 сыл ааһа оҕуста. Наммара үрэх үрдүгэр турар дьэрэкээн оҕо саас дыбарыаһыгар - Иван Николаевич Гуляев аатынан орто оскуолаҕа оҕо - аймах муһунна, дьон - сэргэ тоҕуоруйда. Бүгүн оскуола 60 - с төгүл тапталлаах уолаттарын, кыргыттарын айаҥҥа атаарар. Быйылгы дьыллаахха Дьүлэй нэһилиэгин аҕыс арылы кэрэ кыргыттара, икки ис киирбэх бэйэлээх уолаттара оскуоланы бүтэрэллэр. Оҕолор, учууталлар, төрөппүттэр үөрүүлэрин тэҥҥэ үллэстэ кэллилэр "Таатта улууһа" МТ баһылыга Айаал Семенович Бурцев, Тааттатааҕы үөрэх салаатын начальнига Иннокентий Иннокентьевич Дягилев. Туора- Күөл орто оскуолатын выпускниктара - бары даҕаны бииртэн биир араас талааннаах оҕолор. Кинилэр ортолоругар Бүтүн Россиятааҕы научнай-практическай конференциялар кыайыылаахтара Далаана Ефимова, Айыллаана Никитина үөрэнэллэр. Олимпиаднай хайысхаҕа чаҕылхай ситиһиилээх Эвелина Ефимова, Камилла Егорова, Эрчим Евграфов, Далаана Данилова кыайыыларынан бары киэн туттабыт. Талааннаах үҥкүүһүттэр Айгыына Ефимова, Виолетта Лукина - "Дьиэрэҥкэй" оҕо образцовай хореографическай ансамблын сулустара. Артем Васильев Саха Республикатын биир бастыҥ хабылык, хаамыска оонньуур спортсмена. Таня Алексеева- ураты талааннаах худуоһунньук. Айылҕаттан айдарыылаах Дьүлэй сирин кэрэ кэскиллэрин кылаастарын салайааччыта Саха Республикатын үтүөлээх учуутала, үгүс көлүөнэ оҕолору математика наукатыгар уһуйбут Гуляева Ульяна Ивановна буолар. Алын сүһүөх оскуолаҕа 10 талааннаах бэйэлээх уолаттар, кыргыттар Ульяна Жарафовна Данилованы кытта мындырдык алтыһан, ааҕа суруйа, суоттуу үөрэммиттэрэ. Тиһэх чуораан лыҥкыныыр дьоро күнэ оҕо саастыын арахсыы долгутуулаах бырааһынньыга курдук толкуйданан ыытылынна. Оҕолор ийэлэрин, аҕаларын кытта кэрэтик киэргэммит сыанаҕа дохсун ытыс тыаһынан тахсан олордулар. Бырааһынньык улуу композитор Антонио Вивальди айымньытынан Семен Дмитриевич Андросов туруорбут "Дьыл кэмнэрэ"диэн үҥкүүттэн саҕаланна. Сайыны күһүн солбуйан, саас сайынныын атаарсан дьыл - хонук түргэнник көтөрө көһүннэ. "Оҕо сааһым миигинниин" диэн дьоҕус дьүһүйүү дьоро күҥҥэ мустубут дьону барытын долгутта. Ити курдук оҕолор оскуола директорын Гуляева Оксана Николаевна алгыһын ыллылар. Улуустарын баһылыгын Айаал Семенович тускуга туһаайар сүбэлэрин, эҕэрдэтин иһиттилэр. Таатта үөрэҕин салаатын начальнигын Иннокентий Иннокентьевич истиҥ - иһирэх тылларыттан үөрдүлэр. Оҕо саастарын үтүө доҕоро уһуйаан старшай иитээччитэ Вера Васильевна эҕэрдэтин олус истиҥник иһийэн иһиттилэр. Кырачаан ырыаһыт Далаана Туласынова солун ырыата бырааһынньыгы киэргэттэ. Оскуола алын сүһүөҕүн бүтэрэр өйдөөх, талааннаах 4 кылаастар көрдөөх- нардаах, чаҕылхай 3 кылаас уолаттарын, кыргыттарын эҕэрдэтин иһиттилэр. Оскуола бииртэн биир өйдөөх, араас айар талааннаах оҕолоро- тохсус кылаастар. Ардахтаах эрээри, үөрүүнэн толору үтүө күн учууталларын Вера Дмитриевна Павлова, Октябрина Егоровна Сыромятникова алгыстарын ыллылар. Төрөппүттэрин баҕа санааларын сүрэхтэригэр саһыардылар.Ахсыс кылаас үөрэнээччилэрэ тапталлаах доҕотторун бэлэх- туһах тутуурдаах үөрэх саҥа түһүмэҕэр атаардылар. "Оҕо саас биһиги сүрэхпитигэр" диэн Тиһэх чуораан дьоро күнүн үөрүүтүн иилээн - саҕалаан ыыттылар эдэр учууталлар Аэлита Афанасьевна Николаева уонна Николай Эдуардович Марков. Оскуола вальса Наммара үрэх үрдүнэн дьиэрэйдэ. Алтан чуораан лыҥкыната ыллаата. Дьүлэй сирэ оҕолорун улахан олоххо алҕаан атаарда. Лилианна Егорова.