МБОО Туора-Кюельская СОШ имени Ивана Николаевича Гуляева
Образование · 3 сентября 2026 г.
🍁 Күндү үөрэнээччилэр, ытык-мааны учууталлар уонна убаастабыллаах төрөппүттэр! 🍁 — 3 сентября 2026 г. в 11:02:07.836
🍁 Күндү үөрэнээччилэр, ытык-мааны учууталлар уонна убаастабыллаах төрөппүттэр! 🍁 Барыгытын саҥа үөрэх сылынан уонна Билии күнүнэн ис сүрэхпиттэн эҕэрдэлиибин! Балаҕан ыйын 1 күнэ - хас биирдиибитигэр ураты, долгутуулаах уонна сырдык бырааһынньык, саҥа былааннар, саҥа кыайыылар уонна умнуллубат кэмнэр бастакы үктэллэрэ. Саҥа үөрэх сыла уларытыылардаах киирэр. Ол курдук, биһиги орто сүһүөх үөрэнээччилэрбит историяны өссө дириҥэтэн, элбэх чааһы үөрэтиэхтэрэ. 5-с кылаастарга «Россия духуобунай-сиэрдээх култуурата» диэн саҥа, олус суолталаах предмет эбилиннэ. Бу уруокка оҕолорбут дойдубут үгэстэрин, сиэрин-майгытын уонна история холобурдарын үөрэтиэхтэрэ. Быйыл улууспут оскуолаларыгар барыта 2822 оҕо үөрэнэ кэллэ. Кинилэртэн 216 аан бастаан оскуола боругун атыллаатылар. Аны биир ураты долгуйа турар дьоммутунан буолаллар - выпускниктарбыт. Быйыл оскуоланы барыта 215 үөрэнээччи бүтэрэр. Доҕоттоор, бу эһиги оскуолаҕа тиһэх сылгыт. Идэни талыыга, олох суолун булууга бу сыл саамай эппиэтинэстээх кэм. Сүрүн болҕомтону үөрэххитигэр ууран, инники сыалгытыгар эрэллээхтик хаамыҥ! Күндү учууталларбыт! Эһиги оҕолорбутугар олох киэн аартыгын арыйан уопсустабаҕа туһалаах дьон буолалларыгар сирдьит буолаҕыт. Саҥа үөрэх бырагыраамаларын олоххо киллэрэр уустук үлэҕитигэр тулуурдаах, айымньылаах уонна ситиһиилээх буолуҥ. Эһиги билиигит уонна сылаас сыһыанныт хас биирдии оҕоҕо угуллуон баҕарабын. Ытыктабыллаах төрөппүттэр! Оҕолоргутугар саамай эрэнэр дьоно эһиги буолаҕыт. Саҥа үөрэх сылыгар оҕолоргутун өйдөөн, өйөөн, кинилэр ситиһиилэриттэн үөрэн, бииргэ үлэлэһиэҕиҥ диэн ыҥырабын. Саҥа үөрэх сыла барыбытыгар таһаарыылаах, үгүс ситиһиилээх буоллун! Үөрэх салалтатын начальнига Иннокентий Иннокентьевич Дягилев