Бүген Арчада Татарстан Республикасы мәгариф һәм фән хезмәткәрләренең милли мәгариф буен... — 24 июня 2026 г. в 13:18:19.086
Бүген Арчада Татарстан Республикасы мәгариф һәм фән хезмәткәрләренең милли мәгариф буенча август киңәшмәсе узды. Пленар утырыштан соң, Татарстан Республикасы мәгариф идарәләренең милли мәгариф өчен җаваплы методистлары һәм белгечләре Арча шәһәренең 5 нче гимназиясе һәм 1 нче балалар бакчасы эшчәнлеге белән таныштылар. Гимназиянең ишегалдында укучылар һәм балалар бакчасында тәрбияләнүчеләр кунакларны төрле телләрдә сәламләп, халкыбыз гореф-гадәтләре үрнәгендә чәк-чәк һәм милли бию белән каршы алдылар. Балалар бакчасында халкыбызның гореф-гадәтләрен чагылдырган “Печән өмәсе” күренешен, гимназия укучыларының бөек шагыйребез Г. Тукайның 140 еллыгына багышланган “Тукай аланы” күргәзмәсе, “Шагыйрь бүлмәсе», «Туган як», “Милли хәзинәләр картасы” проект эшчәнлекләрен карадылар. Шулай ук гимназия һәм районыбыз өчен елның иң зур вакыйгасы булган, Татарстан Республикасын, татар мәдәниятен һәм милли әкият геройларын Европа киңлегендә таныткан 3 нче сыйныф укучысы Александр Лесенко һәм аның әтисе Артем Петрович Лесенконың 2 телдә иҗат иткән “Шүрәле турында” китабы белән ташыштылар. Шулай ук “Халкыбызның күңел бизәкләре” милли остаханәсе белән дә таныштылар. Милли мәгариф өчен җаваплы методистлар һәм белгечләрнең секция утырышы эшчәнлеге гимназиянең актлар залында дәвам итте. Утырышны Татарстан Республикасы мәгариф һәм фән министрлыгының милли мәгариф идарәсе җитәкчесе, филология фәннәре докторы Шәрипова Алсу Сәмигулла кызы алып барды. Татарстан Республикасы мәгариф һәм фән министры урынбасары, Мәгариф өлкәсендә күзәтчелек һәм контроль департаменты җиткәчесе Захарова Светлана Николаевна 2026-2027 нче уку елынннан керәчәк үзгәрешләр белән таныштырды. Татарстан Республикасы Мәгарифне үстерү институты татар теле һәм әдәбияты кафедрасы мөдире, филология фәннәре кандидаты Шәмсетдинова Рәсимә Равил кызы “Укытучының һөнәри үсешен формалаштыруда методик эшчәнлекнең формалары һәм ысуллары” чыгышын тәкъдим итте. Республика олимпиада үзәге директоры Исламова Гөлнара Илдар кызы 2022-2026 нчы елларда туган тел һәм туган телдәге әдәбияттан үткәрелгән республика олимпиадалары нәтиҗәләренә йомгак ясап узды. Эшлекле утырышта “Татар теле һәм әдәбиятыннан бердәм республика имтиханы һәм төп дәүләт имтиханы нәтиҗәләре” буенча Казан федераль университеты Филология һәм мәдәниятара багланышлар институты доценты Мөгътәсимова Гөлназ Ринат кызы чыгыш ясады. Татарстан Республикасы Арча муниципаль районы мәгариф идарәсе методисты Мостафина Энҗе Габдулатҗан кызы бүгенге чара кунакларын Арча муниципаль районы эш тәҗрибәсе белән таныштырды. Милли мәгариф өчен җаваплы методистлар һәм белгечләрнең секция утырышы эшлекле һәм нәтиҗәле узды.