МБОУ "Балтасинская СОШ" (Республика Татарстан,ОО)-MAX
Образование · 23 октября 2026 г.
2026 елның 23 октябрендә мәктәбебездә татар теле һәм әдәбияты укытучыларының чираттагы...
2026 елның 23 октябрендә мәктәбебездә татар теле һәм әдәбияты укытучыларының чираттагы район семинары булып үтте. Чара “Милли мирас — кешелек кыйммәтләре — заманча технологияләр” дигән мөһим теманы яктыртты. Семинар программасы бик тыгыз һәм эчтәлекле оештырылган иде. Семинарда районның төп һәм урта гомуми белем мәктәпләренең татар теле һәм әдәбияты укытучылары катнашты. Мөгаллимнәргә Балтач мәктәбенең югары категорияле татар теле һәм әдәбияты укытучылары ачык дәресләрен тәкъдим иттеләр. 8-б сыйныфында Г.И. Хәйруллина “Сыйфатларның исемләшүе” темасына татар теле дәресе күрсәтте. 6-б сыйныфында Р.Р. Шакирҗанова Ф.Яруллинның “Сез иң гүзәл кеше икәнсез” шигыре буенча әдәбият дәресе уздырды. 5-а сыйныфында Г.М. Хәйретдинова укучылар белән “Батырлар йолдызлыгына сәяхәт” исеме астында фонетика бүлеген кабатлады. 10-б сыйныфында Н.К. Гарифҗанова “Сүзләр Сабантуе” темасына татар теле дәресе тәкъдим итте. Дәресләр арасында кунаклар мәктәпнең медиастудиясе җитәкчесе Г.И. Хәйруллина җитәкчелегендә әзерләнгән “Мәктәп сулышы” радиотапшыруын тыңладылар. Мәктәп директоры Г. Ф. Гыйләҗева, музей җитәкчесе Р.Р. Шакирҗанова кунаклар өчен белем йорты һәм аның бай тарихлы музее буйлап танышу экскурсиясен оештырдылар. Семинарда, әниләр һәм кыз балалар өчен өчен уздырылган тәрбия чарасын отышлы итеп оештыру тәҗрибәсен уртаклашып, Т.Миңнуллинның “Әниләр һәм бәбиләр” драмасыннан сәхнәләштерелгән өзек тәкъдим ителде. Н.К. Гарифҗанова, Р.Ә. Закирова, Э.Ф. Фәйхретдинова, Г.И. Хәйруллина, Г.М. Хәйретдинова, Р.Р. Шакирҗанова чыгышы тамашачыларда тирән тәэсирләр калдырды. Чара ахырында мәгариф идарәсе методисты Ф.Т. Сабирова һәм татар теле һәм әдәбияты укытучыларының район методик берләшмә җитәкчесе Л.М. Нәкыйпова катнашында түгәрәк өстәл узды. Фикер алышуларда барлык татар теле һәм әдәбияты укытучылары актив катнашты. Биредә күрсәтелгән дәресләргә җентекле анализ ясалды, заманча технологияләрне милли мирасыбыз белән бәйләп укыту алымнары турында фикер алышынды. Кулланылган методикалар югары бәяләнде, укытучылар үз эшчәнлекләрендә кулланырлык яңа идеяләр өйрәнделәр.