Балаҕан ыйа - Улуу Суорун ыйа.
Балаҕан ыйа - Улуу Суорун ыйа. Балаҕан ыйын 17 күнүгэр Баатаҕай орто оскуолатын үөрэнээччилэрэ, учууталлара, төрөппүттэрэ уонна үлэһиттэрэ Улуу Суорун ыйын бэрт сэргэхтик, сонуннук көрүстүбүт. Балаҕан ыйа күһүн саҕаламмытын бэлиэтиир - аата да этэринии, саха дьоно сайылыктан көһөн кыстыыр балаҕаннарыгар киирэр кэмнэрэ буолар. Өбүгэлэрбит балаҕан ыйыгар түбүктэрэ дьэ саҕаланара: хотон сыбаҕын быраҕыы, оттук маһы бэлэмнээһин. Бу кэмҥэ кинилэр кэлэр кыһын хайдах буолуоҕун уонна эһиилги дьылы ардах төһө түһэринэн, айылҕа уларыйыытынан кэтээн көрөллөрө, сылыктыыллара диэммит араас билгэлэри билиһиннэрдибит. Билигин даҕаны биһиги балаҕан ыйыгар бүтэһик сылаас күннэри баттаһа айылҕаҕа сылдьа, сир аһын сомсо сатыыбыт - отоннуубут, тэллэйдиибит, бултуубут - алтыыбыт. Хаһаайкалар оҕуруоттарын үмүрүтэллэр, хаһаас ас бэлэмнэнэллэр диэммит сир астарын астаан аҕалан хас биирдии үөрэнээччини, ыалдьыты күндүүлээтибит. Балаҕан ыйа саҕаланыаҕыттан үөрэнээччилэр, төрөппүттэр уонна учууталлар оскуолаҕа күн аайы үөрэ - көтө тоҕуоруһалларыттан үөрэбит уонна астынабыт. Сайыҥҥы сынньалаҥ бүтэн, маҥнайгы үөрүүлээх көрсүһүүлэр буолуталаатылар. Ордук үөрбүт, долгуйбут оҕолор - маҥнайгы кылааска саҥа киирээччилэр. Кинилэр аан маҥнайгы учууталларын кытта билсиһэн үөрүүлээх түгэннэрэ күн аайы элбээтэр элбээн иһэр. Дьэ, ити курдук Баатаҕай орто оскуолатыгар ыйын аайы ыытыллар сахалыы тыыннаах тэрээһиннэрбитин өрө көтөҕүллүүлээхтик саҕалаатыбыт. Улуу Суорун ыйын 1 уонна 2 кылаас салайааччылара Стручкова А.Н., Горохова Я.С., Ефимова Т.Е., Ощепкова В.П. уонна Куприянова А.Е., "Күн оҕолоро " түмсүү актыбыыстара тэрийэн, иилээн - саҕалаан ыыттылар. Кинилэр үөрэнээччилэргэ, учууталларга уонна төрөппүттэргэ Улуу Суорун ыйын туһунан иһитиннэриилэри оҥорон, кинигэ уонна сахалыы иһиттэр быыстапкаларын көрдөрдүлэр. Сарсыардаттан саҕалаан уон араас сир отонуттан астаммыт барыанньалары, сахалыы лэппиэскэлэри, алаадьылары астаан аҕалан амсаттылар, хас сынньалаҥ аайы сахалыы ырыа - тойук дьиэрэйдэ, оһуохайдаан да ыллылар, үҥкүү - битии да дэлэйдэ. Онон, олоҥхолортон утумнаабыт Улуу муудараһы да эттибит, Эллэй Боотур эһэбит кэс тылын кэпсээммит астына - дуоһуйа тарҕастыбыт. Бу тэрээһиннэрбит өссө да салҕанан бара туруохтара диэн бигэ эрэллээхпит. "Күн оҕолоро" түмсүү Баатаҕай орто оскуолата. 17.09.26 сыл.