"Кэрэ Куо" күрэҕин сонуннара.
"Кэрэ Куо" күрэҕин сонуннара. Алтынньы 10 күнүгэр Баатаҕай орто оскуолатын алын кылаастарын ортолоругар "Кэрэ Куо" диэн ааттаах күрэх кырачаан кыргыттарга бэрт тэрээһиннээхтик уонна сэргэхтик ыытыллан ааста. Бу күрэх сыала -соруга: кыыс оҕоҕо олоххо, бэйэтин норуотун быһыытынан сүҥкэн суолталааҕын өйдөтүү. Хас биирдии кыыс оҕоҕо төрөөбүт Ийэ дойдутун нарыннык таптыырыгар, кэрэ эйгэҕэ талаһарыгар уонна инники олоҕун дьиэ кэргэнигэр бэриниилээх буоларыгар болҕомто уурарыгар анаммыт эбит. Бастаан утаа көрөөччүлэр дохсун ытыс тыаһынан көрүстүлэр, бу "Кэрэ Куо" күрэх ыытааччыларын Баатаҕай орто оскуолатын 5 "В" кылааһын үөрэнээччитин Слепцова Ариаднаны уонна уонна 7 "А" кылаас үөрэнээччитин Смирнов Артему. Ыытааччыларбыт маннык араас тэрээһиннэри ыыта үөрэхтээх буоланнар, мустан олорор көрөөччүлэр болҕомтолорун бэркэ диэн бэйэлэригэр тартылар. Күрэхпит бастакы түһүмэҕин иннинэ барыга бары дьоҕурдаах ыытааччыларбыт дьүүллүүр сүбэ састаабын кытта билиһиннэрдилэр: 1. Рожина Юлия Константиновна - " Жемчужина нации" оройуоннааҕы талааннаах кырасаабыссалар уонна "Тымныы полюһа " конкурстар кыайыылаахтара. 2. Саввинова Надежда Васильевна- Улуустааҕы Оҕо сайдар киинин салайааччыта. 3. Гатилова Дария Ильинична - "Мисс Батагай - 2025" конкурс кыайыылааҕа. 4. Данилова Николь, Ощепков Дамир - "Мисс и мистер школа" конкурс кыайыылаахтара. Бу үөрүүлээх күммүтүнэн бары кырачаан кыргыттарбытыгар ситиһиилэри баҕаран туран бастакы долгутуулаах "Бэйэни билиһиннэрии " диэн түһүмэхпит саҕаламмыта. Бука бары олус чобуотук бэйэлэрин билиһиннэрэн үгүс көрөөччүнү долгуппуттара. Салгыы талааны көрдөрөр түһүмэхпитигэр кырачаан нап - нарын кыргыттарбыт ыллаан - туойан, хомуска дьүрүһүтэн, үҥкүүлээн, хоһоон ааҕан көрөөччүлэри сэргэхсиппиттэрэ. Чахчы даҕаны талааннаахтарын, барыга бары дьоҕурдаахтарын дьүүллүүр сүбэ иннигэр бэркэ диэн дакаастаабыттара. Үһүс түһүмэххэ "Ийэбинээн астыыбын" диэн тиэмэҕэ хас биирдии кыттааччы ийэлэринээн бииргэ астаабыт мип - минньигэс астарын кэпсээн - ипсээн билиһиннэрбиттэрэ уонна амсатан үөрдүбүттэрэ. Төрдүс түһүмэхпит аата " Сахам сирин уруйдуубун..." диэн тиэмэҕэ авангарднай муоданы көрдөрөн көмүскээбиттэрэ. Оо, дьэ саамай сөбүлээбит түһүмэхпит ити этэ. Аата төрөппүттэр кыргыттарыгар бииртэн биир чаҕылхай көстүүмнэри тигэн, ханна да хатыламмат хартыыналары оһуордаан, ойуулаан- бичиктээн көрдөрбүттэрэ. Маны көрөн, чахчы да Сахам сирэ кэрэтиэн, баайын диэн астына, киэн тутта олорбуппут. Бу бүтэһик түһүмэх кэнниттэн, салгыы дьүүллүүр сүбэ түмүгүн билиһиннэрбитэ. Кинилэр кыргыттарга маннык анал ааттары анаабыттара: 1. Анал аат "Айымньы" - Богданова Дияна, 4 "Б" кылаас үөрэнээччитэ. 2. Анал аат "Кэрэ кыыс" Григорьева Даяна, 4 "А"кылаас үөрэнээччитэ. 3. Анал аат "Нарын намчы" - Григорьева Нарыяна, 2 "Б" үөрэнээччитэ. 4. Анал аат "Сардаана" - Столярова Ксения, 3 "Б" кылаас үөрэнээччитэ. 5. Анал аат "Үөрүү " - Колесова Айаана, 1 "Б" кылаас үөрэнээччитэ. Анал ааттар анаммыт кыргыттарын билиһиннэрээт, "Кэрэ Куо" күрэх, муҥур кыайыылааҕын аатын ааттаан уруй-айхал, эҕэрдэ тылларынан билиһиннэрбиттэрэ олус долгутуулаах этэ. "Кэрэ Куо " кыайыылааҕынан буолла саамай чаҕылхай, талааннаах, нап-нарын сибэкки курдук кыысчаан - Аммосова Валя, Баатаҕай орто оскуолатын 3 "А" кылааһын үөрэнээччитэ.