АНАЛ БАЙЫАННАЙ ДЬАЙЫЫ КЫТТЫЫЛААХТАРЫН ДЬИЭ КЭРГЭТТЭРИН СПАРТАКИАДАТА ТҮМҮКТЭННЭ
АНАЛ БАЙЫАННАЙ ДЬАЙЫЫ КЫТТЫЫЛААХТАРЫН ДЬИЭ КЭРГЭТТЭРИН СПАРТАКИАДАТА ТҮМҮКТЭННЭ Бүгүн, анал байыаннай дьайыы кыттыылаахтарын ийэлэрэ, кэргэттэрэ уонна улуус волонтердара, барыта 12 хамаанда күөн көрсөн, илин-кэлин түһүстүлэр. Күрэхтэһии тыҥааһыннаахтык барда, хамаандалар бары күүстээх бэлэмнээхтэрин көрдөрдүлэр. Бүгүҥҥү тэрээһин сыала-соруга — сомоҕолоһууну бөҕөргөтүү, кыайыы туһугар сулууспалыы сылдьар биир дойдулаахтарбыт чугас дьонноругар болҕомто ууруу уонна чөл олоххо көҕүлээһин. Сүрүн күрэхтэһии кэннэ улуус салайааччыларын кытта төгүрүк остуол тэрилиннэ. Манна анал байыаннай дьайыы кыттыылаахтарын дьиэ кэргэттэрин социальнай өттүнэн өйөөһүн, психологическай көмөнү оҥоруу, ону тэҥэ кинилэр күннээҕи олохторугар-дьаһахтарыгар баар кыһалҕалары ырыттылар. Кэпсэтии аһаҕастык барда, хас биирдии кыттааччы бэйэтин санаатын этиннэ, мунаарар ыйытыктарыгар хоруйдары ылла. Түмүккэ бастыҥнарынан буоллулар: I миэстэ — Хара нэһилиэгин хамаандата. Чулуу көрдөрүүлэринэн эрэллээхтик инники күөҥҥэ тахсан, көһө сылдьар кубок туттулар. II миэстэ — I Баатара нэһилиэгин хамаандата. III миэстэ — I Наахара сирин нэһилиэгин хамаандата. Кыайыылаахтарга туоһу суруктар, мэтээллэр уонна сыаналаах бириистэр туттарылыннылар. Бу курдук улууспут дьоно-сэргэтэ түмсүүлээҕин, сомоҕолоһуулааҕын өссө төгүл көрдөрдүлэр. Бука барыгытыгар доруобуйаны, тулууру уонна эйэлээх халлааны баҕарабыт! Хаартыскалары бу сигэнэн киирэн көрүҥ: https://drive.google.com/drive/folders/16eUDqAZEXjKCihv3K6Nomh2PvYQjRWDn?usp=sharing Мэҥэ Хаҥалас улууһун пресс-сулууспата