АММА УЛУУҺУГАР ФИЛИПП ЛОБАНОВ 75 СЫЛЛААХ ҮБҮЛҮӨЙҮГЭР АНАЛЛААХ ТЭРЭЭҺИННЭР ТОРУМНАННЫЛАР — 22 мая 2026 г. в 02:04:47.558
АММА УЛУУҺУГАР ФИЛИПП ЛОБАНОВ 75 СЫЛЛААХ ҮБҮЛҮӨЙҮГЭР АНАЛЛААХ ТЭРЭЭҺИННЭР ТОРУМНАННЫЛАР Амма улууһун дьаһалтатыгар хорсун быһыылаах Саха уола, Кыһыл Сулус уордьан кавалера Филипп Лобанов төрөөбүтэ 75 сылыгар аналлаах тэрээһиннэри бэлэмнииргэ аналлаах сүбэ мунньах буолан ааста. Тэрээһини улуус баһылыгын солбуйааччыта Николай Александрович Ларионов иилээн-саҕалаан ыытта. Комиссияҕа Үөрэх салаатыттан начальнигы солбуйааччы Акулина Семеновна Иванова, "Навигаторы детства" федеральнай проект муниципальнай куратора Майя Капитоновна Карманова, Ф. Лобанов аатынан Чапчылҕан оскуолатын директора Оксана Дмитриевна Емельянова,иитэр үлэҕэ кини сүбэһитэ Тимур Васильевич Пестерев уонна Амма лиссиэйин директорын сүбэһитэ Зинаида Ивановна Бураева, уопсастыбаннас кыттыыны ыллылар. Кэпсэтии кэмигэр Филипп Лобанов аатын үйэтитиигэ, кини олоҕун, бойобуой суолун сырдатыыга, ыччаты патриотическай тыыҥҥа иитиигэ туһуламмыт тэрээһиннэр былааннарын дьүүллэстилэр. Бу ыам ыйын 11-14 күннэригэр Южно-Сахалинскай куоракка "Навигаторы детства" проект чэрчитинэн Форум буолан ааста. Амма улууһуттан күрэҕинэн талыллан кыттыыны ылбыт Зинаида Ивановна уонна Амма иккис нүөмэрдээх оскуолатын иитэр үлэҕэ директор сүбэһитэ Амгалина Васильевна Прокопьева Филипп Лобанов көмүллэ сытар Стародубскай нэһилиэккэ баран көмүс уҥуоҕар сибэкки ууран кэлбиттэрэ. Кини сырдык өйдөбүлүгэр ытыктабыл бэлиэлээх сырыыларын туһунан билиһиннэрбиттэрин иһиттибит. Сүбэ мунньах түмүгүнэн, 2027 с. үбүлүөйдээх сылга Филипп Лобанов аатын үйэтитиигэ араас хабааннаах тэрээһиннэр ыытыллыахтара: ахтыы киэһэлэрэ, оскуолаларга кылаас чаастара, улуус иһигэр өйдөбүнньүк миитиннэр, военно-патриотическай кулууптарга күрэх, Сахалин уобалаһыттан ааттаах-суоллаах дьон кыттыылаах көрсүһүүлэр буолуохтара. Маны сэргэ, Филипп Лобанов аатын үйэтитиигэ анаммыт өйдөбүнньүк бэлиэлэри туруоруу туһунан этиилэр киирдилэр. Улуус салалтата бэлиэтииринэн, маннык тэрээһиннэр ыччакка төрөөбүт дойдуга тапталы, бэтэрээннэргэ ытыктабылы иҥэриигэ улахан суолталаахтар. Филипп Лобанов курдук хорсун дьоммут ааттара умнуллубакка, көлүөнэттэн көлүөнэҕэ бэриллэн иһиэхтээх. Тэрилтэлэр, уопсастыбаннай түмсүүлэр, нэһилиэк олохтоохторо бары бииргэ түмсэн, үбүлүөйдээх тэрээһиннэри үрдүк таһымнаахтык ыытарга бэлэмнэр. Бу күннэргэ чопчу былааннар оҥоһуллан, саӈа 2026-2027 үөрэх дьылыттан үлэлэр саҕаланыахтара.