Ыам ыйын 5 күнүгэр С. П. Алексеев - Боһуут аатынан Чаппанда оскуола-уһуйаанын иһинэн “Ч... — 8 мая 2026 г. в 11:59:10.383
Ыам ыйын 5 күнүгэр С. П. Алексеев - Боһуут аатынан Чаппанда оскуола-уһуйаанын иһинэн “Чуораанчык” улахан бөлөх оҕолоругар, иитээччилэр Иванова Д. Г, Михайлова Н. Г. тэрийиилэринэн «Я - исследователь» эдэр чинчийээччилэр бэйэлэрин үлэлэрин билиһиннэриилэрэ ыытылынна. Уопсайа 5 оҕо кыттыыны ылла. Чинчийээччилэр сүрүн сыаллара уонна соруктара оҕо кыра сааһыттан кэпсиир дьоҕурун сайыннарыы, инники элбэҕи билэригэр, үөрэтэригэр көмөлөһүү буолар. Оҕолор бэйэлэригэр чугас тиэмэлэри талан, санааларын ууран бэлэмнэнэн кэлэн үлэлэрин кэпсээтилэр. Ол курдук Павлов Витя “Дьиэҕэ диэри куттала суох суол” тиэмэни талан, билиҥҥи кэмҥэ саамай наадалаах быраабылалары кытта билсиһиннэрдэ, Прокопьев Айтал “Эмтээх отоннор”диэн биһиэхэ үүнэр :отон, сугун, моонньоҕон туһунан, ханнык ыарыыларга туһалааҕын, ханнык астар баалларын кэпсээтэ, Николаева Уруйдаана “Динозаврдар” тиэмэни талан, 4 араас динозаврдар олохторун, аһылыктарын тустарынан кэпсээтэ. Кононова Алиса эһэтэ Болуодьа уонна эдьиийэ Ева муспут “Значоктар” коллекцияларын билиһиннэрдэ, барыта 800 тахса значок, сэбиэскэй кэмтэн саҕалаан 7 араас хайысханы көрдөрөр - кэпсиир значоктар мунньуллубуттар. Ол курдук Саха сирин историята, Герой куораттар, успуорт, сэбиэскэй кэм бырааьынньыктара, билиҥҥи кэм, үбүлүөйдээх кэмнэргэ тахсыбыт араас значоктар, мультик тиэмэтигэр араас элбэх значоктар баалларын билиһиннэрдэ. Дмитриев Дамир “Саха сылгыта” тиэмэни талан эһээтин кытта дьарыгын, сылгыны көрүү-истии туһунан уонна кини эһэтэ, ыһыахтарга ат сүүрдүүтүгэр кыттарын, ситиһиилэрин, эбэтэ Христина сылгы сиэлиттэн, кутуругуттан араас сахалыы киэргэллэри оҥорорун, сылгы тириититтэн араас ичигэс таҥастар тигиллэллэрин, биэ үүтүттэн кымыс оҥороллорун кэпсээтэ. Түмүккэ бары кыттааччыларга анал дипломнар туттарылыннылар. Бары эдэр чинчийээччилэрбитин эҕэрдэлиибит уонна өссө да үрдүк ситиһиилэри баҕарабыт. Е. С. Тимофеева, бибилэтиэкэр.