🦅 Кындыл аатынан музейга
🦅 Кындыл аатынан музейга Чочу орто оскуолатыгар ыытылла турар "Бүлүү оскуолатын кэскиллэрэ" диэн лааҕырга кэлбит улуус 5-с уонна 6-с кылааһын үөрэнээччилэрэ алтынньы 27 күнүгэр Саха народнай поэта, суруйааччы уонна драматург Иван Михайлович Гоголев-Кындыл олорон ааспыт кэрэ кэмин кытта билсэр сыаллаах Сыдыбыллааҕы музейга сырыттылар. Бу сырыы көннөрү экскурсия буолбакка, оҕолорго анаан анал «Хара кыталык кистэлэҥэ» диэн интерактивнай квест-чинчийии быһыытынан тэрилиннэ. Үөрэнээччилэр үс хамаандаҕа арахсан, музей 11 экспозициятын устун ураты маршрутунан айаннаатылар. Хамаандалар поэт хоһооннорун тылларынан былыргы саха малларын — чороону, хомуһу, көҕүөр иһити уонна дэйбиири булан, кинилэр устуоруйаларын чинчийдилэр. Ону таһынан, Иван Михайлович бэйэтин туттубут суруйар остуолун таһыгар сылдьан, кини айар үлэтин кистэлэҥнэрин таайдылар, Кындыл хоһоонноругар анаммыт видео-клиптары оҕолор тута уһулан көрдөрдүлэр. Эдэр чинчийээччилэр айар дьарыкка «Кыталык — дьол көтөрө» диэн өйдөбүнньүк оҥоһуннулар. Түмүккэ кыайыылаах хамаандалар наҕараадаланнылар. Ол кэннэ поэт олорбут дьиэтигэр сырыттылар, саха ыалын ис бараанын кытта билистилэр. Бу сырыы оҕолорго төрөөбүт сиргэ тапталы уонна суруйааччы олорбут кэмин өйдүүргэ улахан тирэх буолла.