*Икки нэһилиэк оҕолорун дьоллоох түгэннэрэ: "Быраһаай, Букубаар" уонна Дьиэ кэргэн быра... — 2 марта 2026 г. в 03:53:40.382
*Икки нэһилиэк оҕолорун дьоллоох түгэннэрэ: "Быраһаай, Букубаар" уонна Дьиэ кэргэн бырааһынньыктара* Олунньу 14 күнүгэр Өлөөкө-Күөл нэһилиэгэр олус үөрүүлээх уонна умнуллубат күнүнэн буолла. Д.С.Слепцов аатынан Эбээх орто үөрэхтээһин оскуолатын 1 кылаас үөрэнээччитэ Стручкова Ильяна, төрөппүттэрин уонна учууталын кытта ыаллыы нэһилиэккэ Г. Г. Софронов аатынан Өлөөкө-Күөл агроферменскэй хайысхалаах орто уопсай үөрэхтээһин оскуолатыгар *"Быраһаай, Букубаар!"* диэн үөрүүлээх бырааһынньыгы тэрийэн ыыттыбыт. *Бастакы чаас —* "Букубаар алгыһа" диэн ааттанан, үөрүүлээх түһүмэх ааста. Бу чааһы 1 кылаас учуутала Светлана Алексеевна Никулина салайан ыытта. Оҕолор букубаары аахпыт кэпсээннэрин дорҕоонноохтук кэпсээтилэр, хоһоон ааҕан, таабырыннары таайан учууталлары, төрөппүттэри уонна ыалдьыттары сөхтөрдүлэр. Оскуола иитэр-үөрэтэр завуһа, уһуйаан иитээччитэ уонна оскуола библиотекара үөрэнээччилэргэ алгыс тыллары уонна кыра сэмэй бэлэхтэри туттардылар. Ону тэҥэ, үөрэнээччилэр анал ааттарынан наҕараадаланнылар: • "Кэрэ буочар" аатын Кривошапкин Саргылан ылла. • "Бастыҥ кэпсээнньит" Рахматуллина Аделина буолла. • "Бастыҥ ааҕааччы" аатын Стручкова Ильянаҕа туттарылынна. *Иккис чаас -* Тапталлаахтар күннэригэр анаан "Мин уонна Дьиэ кэргэн" диэн куонкуруһунан салҕанна. Бу чааһы мин ыыттым. Куонкуруска кытыннылар: 1. Кривошапкин Саргылан - ийэтэ Ньургуйаана Семеновна, аҕата Егор Эдуардович. 2. Рахматуллина Аделина - ийэтэ Юлия Алексеевна, аҕата Станислав Юрьевич. 3. Стручкова Ильяна - ийэтэ Екатерина Андреевна, аҕата Илья Васильевич. Эдэр төрөппүттэр оҕолорун кытта бииргэ араас ыйытыыларга хоруйдаатылар, шариктарга өҥнөөх кумаҕынан оҕолорун сирэйдэрин мөссүөнүн кырыйан сыһыардылар. Ону сэргэ, дьиэ кэргэн гербэтин айан, толкуйдаан оҥорбуттарын оҕолорун кытта төрөппүттэр көмүскээн кэпсээтилэр. Төһө да икки ыаллыы нэһилиэк холбоон 1 кылааска үс эрэ үөрэнээччи үөрэнэр да буоллар, төрөппүттэр, эбээлэрэ уонна хос эбээ бэйэлэрин санааларын түһэрбэккэ, оҕолорун кытта көҕүйэн кыттыыны ыллылар. Бары кыттыыны ылбыт төрөппүттэргэ уонна оҕолорго сэмэй бэлэхтэри туттардыбыт. *Үһүс чаас -* бырааһынньыктааҕы ас-үөл остуолунан түмүктэннэ. Манна төрөппүттэрбит араас аһы астаан, минньигэс туорттары оҥорон, дьоро киэһэбитин үөрэн-көтөн, хоһоон ааҕан, ирэ кэпсэтэн, оскуолаҕа экскурсиялаан, оонньоон-күлэн астына түмүктээтибит. Бу бырааһынньык икки нэһилиэк үөрэнээччилэрин, төрөппүттэрин доҕордоһууларын бөҕөргөттө, оҕолорго ааҕыыга тардыһыыны уонна дьиэ кэргэн суолтатын өйдөбүлүн биэрдэ. Ыаллыы олорор Г. Г. Софронов аатынан Өлөөкө-Күөл агроферменскэй хайысхалаах орто уопсай үөрэхтээһин оскуолатыгар 1 кылаас, 5 кылаас кэллэктиибигэр, учууталыгар Светлана Алексеевнаҕа уонна төрөппүттэригэр итии-истиҥ көрсүһүүгүтүгэр уонна миэхэ күүс-көмө буолбут Колесовтар дьиэ кэргэнигэр, М.И.Ушаковаҕа, Р.Н.Сивцеваҕа махталбытын тириэрдэбит. Д.С.Слепцов аатынан Эбээх орто уопсай үөрэхтээһин оскуолатын үрдүк категориялаах алын сүһүөх кылааһын учуутала, СӨ үтүөлээх учуутала, Учууталлар Учууталлара, Педагог-наставник, РФ Бочуоттаах учуутала Надежда Христофоровна Семёнова.