МИХАИЛ ИЛЬИЧ ЕГОРОВ ТӨРӨӨБҮТЭ 100 СЫЛЫГАР АНАММЫН КИНИГЭ СҮРЭХТЭННЭ
МИХАИЛ ИЛЬИЧ ЕГОРОВ ТӨРӨӨБҮТЭ 100 СЫЛЫГАР АНАММЫН КИНИГЭ СҮРЭХТЭННЭ Бүгүн, ыам ыйын 27 күнүгэр, Хаптаҕай нэһилиэгэр Саха Өрөспүүбүлүкэтин мецената, Аҕа дойду сэриитин II истиэпэннээх уордьанын кавалера, Мэҥэ Хаҥалас улууһун, Хаптаҕай нэһилиэгин Бочуоттаах олохтооҕо, дойдубут биир тумус туттар ытык кырдьаҕаһа Михаил Ильич Егоров төрөөбүтэ 100 сылын көрсө кини сырдык аатын үйэтитэр, олоҕун сиһилии билиһиннэрэр кинигэ сүрэхтэннэ. Бу дьоһуннаах кинигэни М.К. Аммосов аатынан Хотугулуу-Илиҥҥи Федеральнай университет бэтэрээнэ, Саха Өрөспүүбүлүкэтин үөрэҕириитин үтүөлээх үлэһитэ, "учууталлар Учууталлара", Мэҥэ Хаҥалас, Майа сэлиэнньэтин уонна Мөҥүрүөн нэһилиэгин Бочуоттаах олохтооҕо Февронья Егорова суруйан, түмэн, 205 ахсааннаах кинигэни бэчээттэтэн таһаарда. Кинигэҕэ Михаил Ильич дириҥ, баай ис хоһоонноох олоҕо, айыы санаанан сиэттэрэн олорбут сырдык холобура, үгүс үтүө дьыалаҕа олук уурбутун туһунан сиһилии суруллубут. Үөрүүлээх тэрээһиҥҥэ улуус дьокутааттарын Сэбиэтин бэрэссэдээтэлэ Иннокентий Андросов, Арассыыйа билимин академиятын Сибиирдээҕи салаатын Саха сиринээҕи билим киинин дириэктэр сүбэһитэ, Ил Түмэн дьокутаата Тихон Скрябин, М.К. Аммосов аатынан Хотугулуу-Илиҥҥи федеральнай университет норуоттар тылларын уонна култуураларын институтун дириэктэрэ, педагогическай билим хандьыдаата Гаврил Торотоев, Хаптаҕай нэһилиэгин баһылыга Иван Зыков, үөрэҕирии салалтатын салайааччыта Ирина Плотникова эҕэрдэлэри тиэртилэр уонна наҕараадалары туттардылар. Михаил Ильич олоҕо бар дьоҥҥо үтүө, амарах сыһыан чаҕылхай холобура буолар. Кини билии-көрүү, үөрэх, култуура сайдыытыгар киллэрбит сүдү кылаата, үтүө дьыалалара, төрөөбүт дойдутугар дьиҥ таптала кэлэр кэнэҕэски ыччакка көлүөнэттэн көлүөнэҕэ бэриллэн иһиэҕэ диэн эрэнэбит. Мэҥэ Хаҥалас улууһун дьаһалтатын пресс-сулууспата