"Мин Сахам Сирэ ааҕар" күрэххэ улууспыт чиэһин көмүскээбит, күн аайы көхтөөхтүк куоласт...
"Мин Сахам Сирэ ааҕар" күрэххэ улууспыт чиэһин көмүскээбит, күн аайы көхтөөхтүк куоластаабыт бар дьоммор махтал! Күндү Үөһээ Бүлүү улууһун олохтоохторо! «Мин Сахам Сирэ ааҕар» өрөспүүбүлүкэтээҕи күрэххэ улууспут олохтоохторун көхтөөх, түмсүүлээх кыттыыларынан Кыайыылаах аатын ыллыбыт! Ыйы супту улууспут бары олохтоохторо, Үөһээ Бүлүүттэн төрүттээх дьоммут, Арассыыйа араас эрэгийиэннэриттэн, тас дойдулартан, ону таһынан анал байыаннай дьайыы хонуутуттан биир дойдулаахтарбыт күн аайы тохтоло суох куоластарын биэрэн, маны сэргэ Бүлүү бөлөх улуустарын олохтоохторун күүстээх өйөбүллэринэн 204 798 куолаһы хомуйан, биһиги улууспут Саамай Ааҕар улуус аатын ылла! Бу күрэх биһиги Үөһээ Бүлүүлэр күүстээх түмсүүбүтүн, сомоҕолоһуубутун өссө төгүл чаҕылхайдык көрдөрдө. Күрэх устата техническэй биричиинэнэн элбэх соһуччу түгэннэр буолбуттарын үрдүнэн, биһиги бэриммэккэ, дьулуурдаахтык куоластааммыт бу кыайыыны ылбыппытыттан олуһун киэн туттабын! Бу КЫАЙЫЫ биһиэхэ ураты ис хоһоонноох буолар. Үөһээ Бүлүү улууһа үөрэххэ-билиигэ тардыһар, кинигэни таптаан ааҕар дьонноох, Саха сирин өй кыаҕын биһигэ буоларын өссө төгүл дакаастаатыбыт. Маны таһынан, быйыл Үөһээ Бүлүүтээҕи киин библиотека "Дьиэ кэргэн" Национальнай бырайыак чэрчитинэн ыытыллар "Дьиэ кэргэн сыаннастара уонна култуура инфраструктура" диэн федеральнай бырагырааммаҕа кыайан, федеральнай бүддьүөттэн үп көрүллэн хапытаалынай өрөмүөннэниэҕэ. Хапытаалынай өрөмүөннэммит, саҥардыллыбыт киин библиотекабытыгар бу Кубокпыт биир бастыҥ, киэн туттар ситиһиибит буолан киэргэтиэҕэ! Бу күрэххэ кыттыбыт, куолас биэрби хас биирдии дьоммор истиҥ махталбын тиэрдэбин! Биһиги биир сомоҕо буоллахпытына хайа да үрдүгү дабайыахпыт! Эҕэрдэни кытта, Үөһээ Бүлүү улууһун баһылыга В. В. Николаев #МояЯкутияЧитает #ҮөһээБүлүү max.ru/channel_VNikolaev