ХОРООБУТ ОРТО ОСКУОЛАТЫГАР АГРОТЕХНОЛОГИЧЕСКАЙ ХАЙЫСХАЛААХ КЫЛААС АРЫЛЫННА — 15 сентября 2026 г. в 03:59:23.579
ХОРООБУТ ОРТО ОСКУОЛАТЫГАР АГРОТЕХНОЛОГИЧЕСКАЙ ХАЙЫСХАЛААХ КЫЛААС АРЫЛЫННА Бүгүн, балаҕан ыйын 15 күнүгэр, Хорообут нэһилиэгэр үөрүүлээх, суолталаах түгэн буолла. Дмитрий Таас аатынан Хорообут орто оскуолатыгар сабыс-саҥа агротехнологическай кылаас үөрүүлээх быһыыга-майгыга арылынна! Бу күн биһиги иннибитигэр саҥа аартык тэлэйиллэр. Тыа хаһаайыстыбата — норуот тыына, олох төрдө. Онуоха маннык кылаастары арыйан, биһиги кэнчээри ыччаппытын дойдуларыгар бэриниилээх, аныгы технологиялары баһылаабыт сатабыллаах исписэлиистэр гына иитэн таһаарарбыт — бу улахан эппиэтинэстээх уонна кэскиллээх дьыала. Үөрүүлээх тэрээһиҥҥэ улууспут баһылыга Дмитрий Тихонов, Саха Өрөспүүбүлүкэтин бырабыытылыстыбатын бэрэссэдээтэлин солбуйааччы Сергей Местников, Саха Өрөспүүбүлүкэтин тыатын хаһаайыстыбатын уонна ас-үөл бэлиитикэтин миниистирин эбээһинэһин толорооччу Анна Стручкова, Ил Түмэн Судаарыстыбаннай мунньаҕын дьокутаата Захар Никитин, Хорообут нэһилиэгин баһылыга Гаврил Бродников, улуустааҕы үөрэх салалтатын салайааччы Ирина Плотникова кыттыыны ыллылар. Саҥа кылааска оҕолор тыа хаһаайыстыбатын аныгы көрүҥнэригэр үөрэниэхтэрэ. Билиилэрэ-көрүүлэрэ, ылбыт сатабыллара кинилэр инники идэлэригэр, олохторугар бигэ тирэх, күүстээх акылаат буолуоҕа диэн бүк эрэнэбит. Мэҥэ Хаҥалас улууһун дьаһалтатын пресс-сулууспата.