Дьокуускай куоракка үс күн устата ыытыллыбыт, улууспут үөрэҕириитин 150 сылыгар аналлаа... — 1 апреля 2026 г. в 02:25:33.889
Дьокуускай куоракка үс күн устата ыытыллыбыт, улууспут үөрэҕириитин 150 сылыгар аналлаах үөрүүлээх дьоро тэрээһиннэрбит түмүктэннилэр! Бу үс күн — улууспут сайдыытыгар саҥа кэрдиис кэми арыйар, кэскиллээх бырайыактары олоххо киллэрэр ураты кэм буолла. Тэрээһин чэрчитинэн Саха Өрөспүүбүлүкэтин култууратын уонна духуобунай сайдыытын министиэристибэтин, ону тэҥэ өрөспүүбүлүкэ бастыҥ үөрэх тэрилтэлэрин кытта ыкса бииргэ үлэлэһэр туһунан Сөбүлэҥнэр түһэрилиннилэр. Үөрэҕирии сайдыытын инники 10 сылга былаанныыр, учуонайдар уонна экспердэр кыттыылаах стратегическай сессия ыытылынна. Итини таһынан, улууспут киэн туттар уһулуччулаах дьонун — СССР норуодунай учуутала М. А. Алексеев уонна Саха Сирин автономиятын төрүттэспит политическэй деятель И. Н. Барахов мэҥэ таастарыгар сүгүрүйүү, Арчы дьиэтигэр алгыс түһэрии сиэрэ-туома ыытылыннылар. Тэрээһин түмүктүүр күнүгэр Д. К. Сивцев – Суорун Омоллоон аатынан судаарыстыбаннай опера уонна балет тыйаатырыгар Үөһээ Бүлүү улууһун үөрэх кыһаларын, норуот маастардарын быыстапкалара, Үөһээ Бүлүү улууһун үүт аһы оҥорон таһаарар комбинат бородууксуйатын атыыта, оһуохай түһүлгэтэ уонна үөрүүлээх кэнсиэр дьон-сэргэ болҕомтотун ылла. Дьоро тэрээһиҥҥэ РФ норуодунай учуутала В. Ф. Потапов, СӨ Бырабыыталыстыбатын бэрэсэдээтэлин солбуйааччы А. А. Семенов, РФ Дьоруойа А. Р. Петров, СӨ култуура уонна духуобунай сайдыы миниистирэ А. И. Ноев, СӨ Наукаларын академиятын төрүт тылларын үөрэтэр уонна сайыннарыы киинин салайааччыта, педагогическай наука доктора, профессор Ф. В. Габышева уонна СӨ үөрэх уонна билим миниистирин солбуйааччыта В. А. Захарова кытыннылар. Үөрүүлээх быһыыга-майгыга улууспут үөрэҕириитин систиэмэтигэр чаҕылхай ситиһиилээх, үрдүк дьоҕурдаах үлэһиттэргэ судаарыстыбаннай уонна ведомственнай наҕараадалар туттарылыннылар. Үөһээ Бүлүүлэр өрөгөйдөөх күммүтүгэр түмсэн, улууспут үөрэҕириитин 150 сылын бэлиэтээтибит. Бу үбүлүөй — биһигини өссө бөҕөргөтөр, үрдүк сыалларга сирдиир күүстээх тирэхпит. Үөрэхпит сырдык суола салгыы сайда, саҥа талааннары, саҥа ситиһиилэри бэлэхтии турдун! #Үөрэҕэрии150 #Образование150 #ҮөһээБүлүү T.me/ValeriNikolaev