*Маччаҕа бөҕө — Сунтаар ыһыаҕын өрөгөйө!* — 22 июня 2026 г. в 04:33:27.728
*Маччаҕа бөҕө — Сунтаар ыһыаҕын өрөгөйө!* 🌿🌿🌿Саха норуота былыр-былыргыттан кус быһый, ат түргэн, былчыҥнаах уонна сымса бөҕөстөрүн уос номоҕо гынан кэпсиир үтүө үгэстээх. Кинилэр хорсун, күүстээх быһыылара үгүс үһүйээннэргэ киирэн, көлүөнэттэн көлүөнэҕэ киэн тутта кэпсэнэр. Ол курдук, Бүлүүчээн сиригэр-уотугар төрөөн-үөскээн олорон ааспыт, омуннаах күүстээх Маччаҕа Бөҕө аата Сунтаар ыһыаҕар сыл ахсын айхалланан ааттанар. Бу ураты тэрээһиҥҥэ күүстээхтэр, түргэттэр уонна сымсалар күөн көрсөн, күүһү-уоҕу тургуталлар. Быйыл барыта 5 көрүҥҥэ 11 бөҕөс кыттыыны ылла. Кинилэр ортолоругар «Дыгын оонньууларын» кыттыылааҕа Ньурбаттан Валентин Афанасьев уонна Саха оонньуутун фаворита Алексей Уваровскай баар. Маччаҕа бөҕө кыайыылаахтара 450, 225 уонна 100 тыһыынча солкуобайынан наҕараадаланнылар. Тыҥааһыннаах күрэх түмүгүнэн, Ньурба хоһууна Валентин Афанасьев абсолютнай кыайыылааҕынан буолла. Иккис бочуоттаах миэстэни ураты кыраһыабай уонна сымса киирсиилэри көрдөрбүт Маар-Күөлтэн төрүттээх Алексей Михайлов чиэстээхтик ситистэ. Оттон боруонса мэтээли Алексей Уваровскай түөһүгэр кэттэ. Маны таһынан, быйыл иккис сылын бары көрүҥҥэ эрэллээхтик киирсибит биир дойдулаахпыт Алексей Михайловка "Алмзкредисервис" тэрилтэ "НОРУОТ ТАПТАЛА" анал ааты биэрдэ уонна 20 тыһ. солк. наҕараадалаата. Кини многоборье курдук уустук спорт көрүҥүн толору баһылаабытын дьон-сэргэ сэргээтэ, биһирээтэ, үрдүк хайҕабылы ылла. Бу курдук, өбүгэ үгэһин үйэтитэр «Маччаҕа Бөҕө» күрэхтэһиитэ инникитин даҕаны саха саарыннарын, күүстээхтэрин уонна быһыйдарын түмэ, өрө тута турдун! _Сунтаар улууһун дьаһалтатын пресс-сулууспата_