Кулун тутар 18 күнүгэр биһиги оскуолабытыгар алта оскуола кыттыылаах "Оҕону иитиигэ -үө...
Кулун тутар 18 күнүгэр биһиги оскуолабытыгар алта оскуола кыттыылаах "Оҕону иитиигэ -үөрэтиигэ сахалыы эйгэни тэрийии" диэн методическай күн ыытылынна. Бу күн сыала -соруга оҕону сахалыы тылга үөрэтии, сахалыы эйгэни тэрийэн иитии ньымаларын тобулуу, сахалыы өйгө санааҕа уһуйуу, төрүт үгэстэри туттан саха тыынын киллэрии буолла. Кэлбит ыалдьыттары арыылаах алаадьыннан, уохтаах быырпаҕынан күндүлүү көрүстүбүт, биэс харах харысхаллары бэлэхтээтибит. Тэрээһин линейката Российскай Федерация уонна Саха Сирин гимнын тэҥҥэ ыллаһыыттан саҕаланна, 10 кылаас туйгун үөрэнээччитэ Леонтьев Никон саха тылын кэрэхсиирин, таптыырын, саха буоларыттан киэн туттарын туһунан тыл эттэ. Хас да төгүллээх хоһоон ааҕыытыгар Республиканскай, региональнай, улуустааҕы күрэхтэр лауреаттара, бастыҥтан бастыҥ уоланнар "Лөкөй" бөлөхтөре Кузьмина А Н " Мин тирэхтээхпин" хоһоонун доргуччу ааҕаннар биһирэннилэр. Хас кэлбит оскуолалар 20 учууталлара, эбии үөрэхтээһин уһуйааччылара аһаҕас уруоктары, дьарыктары көрдөрдүлэр, маастар кылаастары ыыттылар. Биһиги оскуолабытыттан учууталлар: 1. Малышева М М 6 кылааска "Dwelling- Дьиэ" английский тыл уруогун 2. Харлампьева З М 6 кылааска "Сахалыы кээмэйдэр" математика уруогун 3. Васильева Р С 1 кылааска " Бүтэй дорҕооннору үөрэтии" саха тылын уруогун 4. Николаева Ф Ф 9 кылааска дьарык " Г И Чиряев олоҕун ыллыгынан" 5. Николаева В Г 9 кылааска дьарык " Муҥхалааһын билиҥҥи ньымата" аһаҕас уруоктары, дьарыктары үрдүк таһымҥа ыыттылар Оскуолалартан уопуттаах учууталлар араас ньымалары, саҥа технологиялары туттаннар оҕону сахалыы үөрэтиигэ маастар кылаастары ыыттылар. Маастар кылаастарга оскуолабыт учууталлара Федорова К Е, Син -Хой С С кытыннылар. Оҕону сахалыы иитиигэ-үөрэтиигэ туһуламмыт быыстапкалар турдулар. Биһиги оскуолабыт үөрэнээччилэрэ хас биирдии ыалдьыкка уу сахалыы эбии үөрэхтээһин дьарыктарыгар тугу үөрэтэллэрин сиһилии кэпсээтилэр, көрдөрдулэр. Ол курдук: 6 кылаас кыргыттара " Эмтээх оттор" куруһуок, 7 кылаас оҕолоро " Көмүс хатырык"куруһуок, сал. А М Мойтохонова, үлэлэрин тумугүн араас эмтээх отторун уонна бэс эриэхэтин барыанньатын, кииһилэ муорсун амсатан, мунду балыктан хатаран хохту түргэнник оҥоһуллар мунду миинин онорбуттарын амсатан интэриэһи тартылар. Араас НПК кыттыбыт миэстэлэспит оҕолор стендовай выставкаларын кэпсээтилэр. 3 кылаас оҕолоро Петров Айгылаан уонна Константинов Илан музейбыт экспонатын туһанан дьоннорун кытта куйуурунан уонна тууннан балыктыыр ньымаларын кэпсээтилэр. Бэрт минньигэс, тотоойу эбиэт кэннэ кэлбит ыалдьыттар А Н Яковлев аатынан иитэр - үөрэтэр " Балыксыт балаҕана" түмэл сэдэх экспонаттарын сэргии көрдүлэр, сиһилии билистилэр. 2 чаастан нэһилиэкпит культуратын дьиэтигэр нэһилиэк баһылыга Доргонова А В уонна кэлбит ыалдьыттар кыттыылаах төгүрүк остуол тула олорон сиһилии кэпсэттилэр, үлэни торумнаатылар. Түмүккэ улуустааҕы үөрэҕирии салаатын үлэһиттэрэ Иннокентьева Вера Степановна уонна Васильева Татьяна Егоровна сертификаттары түҥэттилэр, методическай күн түмүктэрин таһаардылар. Баппаҕаайы орто оскуолатын пресс- киинэ редактор Тарасова Л С "Ох- оскуола хаһыата" хаһыат таһааран түҥэппитэ олус интэриэһинэй буолла. Кэлбит ыалдьыттары олус минньигэс, баай-талым астаах аҥардас балыктан буһарыллыбыт " Күөх Боллох мааныта" диэн фуршет сандалыннан күндүлээтибит. "Оҕону иитиигэ -үөрэтиигэ сахалыы эйгэни тэрийии" диэн методическай күммүтүгэр кэлэн кыттыбыт Илбэҥэ, Дьөккөн, Тааһаҕар, Тоҕус, Бороҕон оскуолаларыгар махталбытын тиэрдэбит. #ЛекеченскаяСОШ #Методдень #Балыксытбалаҕана