Сахалыы Эйгэ – Оҕо Түмсүүтүн Ситиһиитэ!
Сахалыы Эйгэ – Оҕо Түмсүүтүн Ситиһиитэ! Ньурба оройуонун Акана нэһилиэгэр бу күннэргэ сахабыт тылын, култууратын сайыннарар, оҕолорбут талааннарын арыйар дьоһун тэрээһин – “Сахалыы эйгэ - оҕо түмсүүтүгэр” диэн оройуоннай бэстибээл буолан ааста. Бу бэстибээл, 2005 сылтан ыла үтүө үгэскэ кубулуйан, улууспут чаҕылхай, басхан оҕолорун түмэр күүстээх платформанан буолар. Үгүс элбэх бас-көс санаалаах эдэр ыччаты иитэн таһаарбыта чахчы. Былырыын курдук, быйыл даҕаны бу бэстибээл оҕолорго умнуллубат түгэннэри бэлэхтээтэ. Уопсайа 11 оскуолаттан 115 оҕо уонна 17 салайааччы кыттыыны ылан, сахалыы тыыннаах, үөрүүлээх күнү тэрийдилэр. Мустубут хамаандалар бэйэни билиһиннэриигэ, бэйэ бэйиэттэрин хомоҕой хоһооннорунан күрэхтэһиигэ, ыллам ырыа туонатыгар, көрдөөх оонньуу түһүлгэтигэр күөн көрүстүлэр. Оҕолор оонньоон, күрэхтэһэн, салайааччылар төгүрүк остуол тула кэпсэтэн, ырытыһан бэрт тупсаҕай, дьоһун күн ааста. Бу тэрээһин сүрүн сыала – саха оҕото сахалыы ыраастык, чуолкайдык, бэйэни ылыннарар курдук саҥаран, Сир хаһаайына буола улаатарыгар иитиллиэхтээх диэн өссө төгүл бигэргэтилиннэ. Сахалыы иитиигэ ураты, бастыҥ хамсааһыннар, методикалар ырытылыннылар, уопуттар үллэстилиннилэр. Бэстибээл биир үрдүк чыпчаалынан Кытайга баран кылаан кыайыылаах буолбут Дьип Павлович Захаров салайааччылаах “Сир Ийэ иччитэ” диэн бастыҥ испэктээги көрүү буолла. Бу айымньыны көрөн олус долгуйдубут, уйадыйдыбыт. Олус элбэҕи толкуйдатар айымньыны оҥорон, сахалыы тылынан саҥардан киэҥ дойдуга таһаарбыттара хайҕаллаах, үтүө хамсааһын буолар. Маалыкайбыт Оскуолатын Ситиһиитэ! Биһиги Маалыкайбыт оскуолатын оҕолоро бэйэни билиһиннэриигэ уонна хоһоон күрэҕэр кылаан кыайыылаах буоланнар үөрүүбүт үгүс! Бу оҕолорбут талааннара, дьаныардара биһигини үөрдэр уонна киэн туттар. Бары өттүнэн сайдыылаах оҕону иитэргэ араас ситим уонна эйгэ көмөлөһөр – дьиэ кэргэнтэн саҕалаан, олохтоох уопсастыбаннас, үөрэх тэрилтэлэрэ, социальнай партнердар. Бары бииргэ үлэлэһэн, оҕону норуот үгэһинэн иитиигэ, норуот саҥатын сөпкө саҥарарга, уус-ураннык хоһуйарга быһаччы хомуур үлэ улахан оруолу ылар. Ол курдук, уус-уран бэйэни билиһиннэриини, хоһоон хаамыытын, ырыа тутулун Луиза Ивановна Яковлева туруоран баай, толору хоһуйуу таҕыста. Киниэхэ барҕа махталбытын аныыбыт, өссө үрдүк ситиһиилэри баҕарабыт, инникитин холбуу үлэлэһэргэ бэлэммит! Бу бэстибээл оҕолорго үтүө өйдөбүлү хаалларан, кыайыы өрөгөйүн бэлэхтээн, чаҕылхай нүөмэрдэри туруоран умнуллубаттык ааста. Маннык бэстибээллэр аҥардас күрэх эрэ быһыытынан барбакка, оҕолору бэйэ-бэйэлэрин кытары алтыһарга, доҕордуу сыһыаны үөскэтэргэ, санааларын чопчу этэргэ, дойдуларын таптыырга үөрэтэллэр. Бу курдук сахалыы тыыннаах тэрээһиннэр элбии турдуннар!