МБОУ "Мальжагарская СОШ им. В.И. Максимова" МР "Нюрбинский район" РС(Я)
Лайфстайл · 27 мая 2026 г.
Бүтүн Арассыыйа үрдүнэн бэлиэтэнэр библиотека күнүгэр анаан, сылын аайы ыытыллар «Киниг... — 27 мая 2026 г. в 05:41:19.817
Бүтүн Арассыыйа үрдүнэн бэлиэтэнэр библиотека күнүгэр анаан, сылын аайы ыытыллар «Кинигэ күүһэ» республиканскай акция 8-с төгүлүн ыытыллар. Быйылгы акция Арассыыйа норуоттарын сомоҕолоһууларын сылыгар ананна. Онон бу улахан суолталаах тэрээһиҥҥэ Малдьаҕар нэһилиэгин бибилэтиэкэтигэр үтүө-мааны элбэх оҕолоох ыал ийэтэ, эйэҕэс эбээтэ Анна Александровна Непомнящая ыалдьыттаата. Анна Александровна бэйэтинэн үтүө холобур буолар: бастакытынан, кини бэйэтэ кинигэни ааҕарын оҕо эрдэҕиттэн олус таптыыр, оҕолоругар онтон сиэннэригэр кинигэҕэ тапталы иҥэртээн, бибилэтиэкэҕэ сылдьалларын ирдиир, дьиэ кэргэнинэн күн аайы ааҕыыга бириэмэ аныыр үтүө үгэстээх. Иккиһинэн, кини нуучча кэргэннээх. Непомнящий Андрей Борисовичтыын ыал буолан 40-тан тахса сыл дьоллоохтук олорон, элбэх ыччаты тэниттилэр. Онон бу күн Анна Александровна Малдьаҕар оскуолатын 2-3 кылааһын оҕолоругар доҕордуу үс араас омук оҕолорун туһунан кэпсэнэр Суорун Омоллоон «Доҕордуулар» кэпсээнин ааҕан иһитиннэрдэ, ааҕыы киһи олоҕор суолтатын туһунан кэпсээтэ, санаатын үллэһиннэ. Ол курдук, оҕолор айымньыны олус сэргээн иһиттилэр, доҕордоһуу туһунан өс хоһооннор суолталарын быһаарыстылар. араас ыйытыктары биэрдилэр. Анна Александровна сиэннэрэ кинигэ ааҕар кэмнэригэр телефоннарын ылан туспа уурарын туһунан кэпсээбитин сөҕө иһиттилэр. Онон Анна Александровна ыҥырыыбытыгар сөбүлэһэн кэлэн, оҕолорго дорҕоонноохтук кинигэ ааҕыытын, сүбэтин-аматын, сэһэргэһиитин иһин махталбытын биллэрэбит. Бу маннык Өрөспүүбүлүкэ бары библиотекаларыгар ыытыллар “Кинигэ күүһэ” акция оҕону ааҕыыга уһуйууга, кинигэҕэ тапталы иҥэрэргэ биир сүрүн тэрээһин буолар. Бука бары кыттыбыт оҕолорго, ааҕааччыга Саха Өрөспүүбүлүкэтин Национальнай бибилэтиэкэтин аатыттан туоһу суруктар туттарылыннылар.