Үтүө күнүнэн, күндү дьоммут,
Үтүө күнүнэн, күндү дьоммут, Хотой Айыы ыйа түмүктэнэр нэдиэлэтэ тиийэн кэлбитинэн, Олоҥхобут ыйа буолара чугаһаабытынан! Былааннаабыт үлэҕит барыта санаа хоту, үтүө санаанан салайтаран, сүбэнэн-соргунан олоххо киирэн истин! Айылҕабыт барахсан чэбдик ыраас салгына турукпутун тупсардын, олохпут тутула тупсан истин, алаһа дьиэҕит сылааһынан илгийдин, барыта этэҥҥэ эрэ буолуохтун. Төрүт үгэстэри сөргүтэр былааннаах үлэҕит олоҥхоҕо тирэҕирэн, тохтоон хаалбакка миэстэтигэр өйөнөн, бара турдун! Сыллата ыытар үлэбитигэр сүрүн болҕомто олоҥхолооһун үгэстэрин тилиннэриигэ ууруллар. Бу үлэҕэ сүрүн төһүү күүс буолан, үтүө үгэскэ кубулуйан быйыл 22-с төгүлүн ыытыллар „Муҥха олоҥхото” бэстибээл сэтинньи ый 13-15 күннэригэр Бүлүү улууһун Лөкөчөөн сэлиэнньэтигэр ыытыллар. Быйылгы бэстибээлбит бэйэтин кэмигэр үтүө эйгэни иитиигэ улахан оруолу ылбыт биллиилээх олоҥхоһут Василий Осипович Каратаев 125 сылыгар ананан ыытылларын туһунан сыл инниттэн былааҥҥа киллэрэн, тэрээһин үлэни олохтоохтор, тэрийээччилэр былааннаахтык ыыталлар. Олоҥхолуур идэ салгыы сайдан бара турарын туһугар үгэскэ кубулуйбут бэстибээллэр сыл ахсын өйөнөн, болҕомтоҕо ылыллан, сайдан бара туралларыгар баҕарабыт. Улуус түмсүүлэрэ олоҥхону толорор ыччаттаргытын өйөөн кытыннарар үлэни ыытаргытыгар эрэнэбит. Сэтинньи 30 күнүгэр 16 чаастан куйаар ситиминэн (ВКС платформаҕа) Олоҥхо Ассоциация мунньаҕа ыытыллара былааннанар. ВКС мунньахха кыттыыны ылыахтара: Олоҥхо Ассоциациятын улуустааҕы түмсүүлэрэ, Олоҥхо Ассоциация Сүбэтин чилиэннэрэ, култуура, үөрэх, наука тэрилтэлэрин представителлэрэ, общественнай түмсүүлэр. Мунньахха көрүллэр боппуруос: 1. Сыллааҕы үлэ түмүгүн таһаарар, үлэ бастыҥнарын бэлиэтиир үтүө үгэскэ кубулуйбут Олоҥхо Декадатын программатын барылын туһунан. Иһитиннэриини оҥороллор: Ф.В.Шишигина, Р.Н.Анисимов, А.П. Иванова, С.Т. Иванова, С.П. Ядрихинскай. ВКС мунньахха ссылканан холбонон бары көхтөөх кыттыыны ылан, Олоҥхо декадатын тэрээһин боппуруостарынан түмүктээх кэпсэтии тахсарыгар эрэнэбит. ВКС мунньах хаамыытыгар уларыйыы таҕыстаҕына уонна холбонуу ссылкатын эбии ыытыахпыт. Тэрийэр бөлөх