👧🏻🌸Ханнык баҕарар омукка кыыс оҕо иитиитигэр ураты сыһыан баар. Алаһа дьиэни араҥачч...
👧🏻🌸Ханнык баҕарар омукка кыыс оҕо иитиитигэр ураты сыһыан баар. Алаһа дьиэни араҥаччылыыр, иэримэ дьиэни иччилиир, ийэ буолар, омугу түстүүр аналлаах кыыс оҕону кыра сааһыттан харыстаан, кэрэҕэ сыһыаран, олоххо бэлэмнээн улаатыннараллара. 🌼Оннук санаанан салайтаран, Муома орто оскуолатыгар бүгүн үрдүкү кылаастар (9-11) Кэрэ куоларыгар анаан "Кыыс оҕо - кэскил кэрэһитэ" диэн бэрт сэргэх тэрээһин ааста. 🌼Манна даҕатан эттэххэ, 90-с сылларга национальнай кэнсиэпсийэ олоххо киирэригэр ытыктыыр учууталбыт, өрөспүүбүлүкэҕэ киэҥник биллэр педагогическай билим хандьыдаата Галина Семеновна Попова-Санаайа бу тэрээһини иилээн-саҕалаан төрүттээбитэ. Санаайа санаатын салҕаан, кыргыттарга аналлаах тэрээһиммитин сөргүттүбүт. Аактабай саалаҕа сахалыы киэргэммит-симэммит үрдүкү кылаас кыргыттара сэлэлээн хааман киирдилэр. Куоларбыт 4 түһүмэххэ бэйэлэрин холонон көрдүлэр. Кэрэ киэһэни Эрсан Слепцов уонна Мирослав Терешкин хомоҕой тылынан ыыттылар. Түһүмэхтэр быыстарыгар уолан бэртэрэ кыыска анаммыт хоһоону ааҕан, ырыа ыллаан бэлэх ууннулар. Кыргыттар бииртэн биир кэрэ көстүүлээх сахалыы, аныгылыы таҥаһы көрдөрдүлэр, минньигэс амтаннаах аһылыгынан күндүлээтилэр, "Айылҕа уһуктуута" тиэмэнэн кыптыыйынан кырыйан панно оҥордулар, сахалыы хаамыы арааһын көрдөрдүлэр (сэгэлдьийии, долгулдьуйуу, нуоҕалдьыйыы ). Учууталларбыт «Сахам Далбар Хотуна» диэн саха дьахтарын хаамыытын көрдөрөн тэрээһини түмүктээтилэр. Кэрэ Куолар! Көрсүө-сэмэй бэйэҕитин харыстааҥ! Аламаҕай дьон алтыстын, Элэккэй дьон эҥээрдэстин! Омуккут аналын сүтэримэҥ! Кэскили кэҥэтиҥ, Үйэлээҕи үксэтиҥ!