Күндү оскуола үөрэнээччилэрэ, коллективтара уонна кыһамньылаах төрөппүттэрбит! Бүгүҥҥү ...
Күндү оскуола үөрэнээччилэрэ, коллективтара уонна кыһамньылаах төрөппүттэрбит! Бүгүҥҥү долгутуулаах «Тиһэх чуораан» күнүнэн Чурапчы улууһун үөрэҕин салалтатын аатыттан итиитик-истиҥник эҕэрдэлиибит! Үөрэхтээһин эйгэтин сүрүн соругунан үөрэх хаачыстыбатын тупсарыы, саҥаны киллэрэн, иитэр-үөрэтэр үлэбит дойдуга бэриниилээх, сиэрдээх, чөл туруктаах инники олоҕу тутар ыччаты иитиигэ туһуланар. Билиҥҥи кэмҥэ үрдүк көрдөрүүнү ситиһэргэ бары кыахтар бааллар, сөптөөх усулуобуйа оҕо-ыччат сайдарыгар тэриллэр. Бу күҥҥэ улууска 21 оскуолаҕа, 5 оскуола-саадка барыта 3879 оҕо үөрэх дьылын түмүктүүр.Экзаменнаах 9 кылааһы 403, 11 кылааһы 256 выпускник бүтэрэллэр. Үөрэх эйгэтигэр Россия үрдүнэн Оскуола иннинээҕи үөрэхтээһин сыла биллэриллибитэ. Улууспут уһуйааннара таһаарыылаах үлэлэринэн инники күөҥҥэ сылдьаллар. Улууспутугар 16 уһуйаан, 13 оскуола иһинээҕи бөлөх, уопсайа 87 бөлөҕүнэн 1519 иитиллээччини хабан үлэлиир. «Туллукчаан» уһуйаан «Саха Өрөспүүбүлүкэтин бастыҥ тыа сирин уһуйаана» аатын ылла. 237 оҕо оскуолаҕа бараары бэлэмнэнэллэр. Бу үөрэх дьылыгар бары предметтэргэ үөрэхтээһин биир кэлим тутула киирдэ, профильнай үөрэхтээһини кэҥэтиигэ үрдүк үөрэх кыһаларын, науканы уонна тэрилтэлэри кытта бииргэ үлэлэһии бөҕөргүүр. Агротехнологическай үөрэхтээһини сайыннарыыга Саха сирэ инники күөҥҥэ сылдьар, быйыл улуус агрооскуолалаларыгар «Просвещение» издательство үлэһиттэрэ ыалдьыттаан үлэлэрин уопутун билсэн бардылар. Грантовай үлэҕэ Уһук Илин федеральнай уокурукка Саха сирэ лидер буолуутугар биһиги улууспут үөрэҕин тэрилтэлэрэ бэйэлэрин дьоһун кылааттарын киллэрэллэр. СӨ үөрэҕин уонна наукатын миниистирэ Нюргуна Афанасьевна Соколова улуус оскуолаларын үлэтин кытта быһаччы билсэн, оскуолалар сөптөөхтүк дьаһанан үлэлии олороллорун, бэйэлэрин көҕүлээһиннэринэн араас хайысхалаах бырайыактары граннар көмөлөрүнэн олоххо киллэрэллэрин, эдэр кэскиллээх педагогтар айымньылаахтык үлэлии сылдьалларын бэлиэтээбитэ, оскуола музейдара нэһилиэк чулуу, ытык дьонун олоҕун үйэтитиигэ ыытар ситимнээх үлэлэрэ – республика үрдүнэн тарҕанар үчүгэй холобур буолар диэн сыаналаабыта. Улууспутугар оҕону-ыччаты патриотическай иитиигэ ураты болҕомто ууруллар. Оскуолаларга 21 спортивнай, 21 байыаннай-патриотическай кулууптар таһаарыылаахтык үлэлииллэр. Оҕо дьоҕурун сайыннарар сыаллаах араас тэрээһиннэр, олимпиадалар, күрэхтэһиилэр, конференциялар улуус оҕолорун түмэ тардан, тиһигин быспакка ыытыллан кэллилэр. Бу барыта инники кэскилбит, кэнчээри ыччаппыт сайдарыгар, дьоһун дьон буолан тахсарыгар, Чурапчы кэскилэ түстэнэригэр анаммыт үлэ.