Күндү эбии үөрэхтээһин үлэһиттэрэ!
Күндү эбии үөрэхтээһин үлэһиттэрэ! Бүгүҥҥү үөрүүлээх күҥҥүтүнэн — Эбии үөрэхтээһин үлэһиттэрин күнүнэн Чурапчы улууһун үөрэҕин салалтатын уонна үөрэх үлэһиттэрин идэлээх союһун аатыттан итиитик-истиҥник эҕэрдэлиибит! Оҕо айар талаанын уматарга, туһалаах сатабылга үөрэтэргэ уонна улахан олоххо бэйэтин суолун булунарыгар эһиги сүрүн уһуйааччы, бигэ тирэх буолаҕыт, киниэхэ көтөр кынатын үүннэрэҕит. Ким эрэ хомус уонна музыка тыаһыгар кутун туттарар, ким эрэ мас ууһун мындырын баһылыыр. Сорох сыанаҕа үнкүүлээн, ыллаан, атын киһи дьылҕатын итэҕэтиилээхтик оонньоон бэйэни арыйар, үгүстэр успуорт үрдүк ситиһиилэригэр дьулуһаллар. Бу барыта — эһиги сыралаах үлэҕит үрдүк түмүгэ. Кэнчээри ыччаппыт идэтин таларыгар, олоххо бэйэтин суолун уонна бигэ тирэҕин булунарыгар эһиги уурар акылааккыт сыаната биллибэт улахан! Чурапчы улууһугар эбии үөрэхтээһининэн 5303 оҕо хабыллар, 184 араас хайысхалаах кружоктар, секциялар үлэлииллэр. Эһиги хас биирдии үөрэнээччигитигэр, иитиллээччигитигэр тулууру, болҕомтону, тапталы ууран, кинилэр ситиһиилэринэн киэн туттаҕыт. Оҕо дьолломмут хараҕа, оҕо-төрөппүт махтала — бу буолар эһиги сыралаах үлэҕит саамай үрдүк наҕараадата. Барыгытыгар чэгиэн доруобуйаны, тус олоххутугар дьолу-соргуну, дьиэ кэргэҥҥитигэр нус-хас туругу баҕарабыт. Айар аартыккыт арылла турдун, үүнэр ыччат үөрүүтэ эһигини үрдүктэн үрдүккэ кынаттаатын! Эҕэрдэни кытта, Чурапчы улууһун үөрэҕин салалтата уонна үөрэх үлэһиттэрин идэлээх союһун кэмитиэтэ