Муус устар 28 күнүгэр И.И.Гоголева-Дыргыабай аатынан Найахы орто оскуолатыгар " Төрөөбү... — 28 апреля 2026 г. в 07:07:42.312

Муус устар 28 күнүгэр И.И.Гоголева-Дыргыабай аатынан Найахы орто оскуолатыгар " Төрөөбүт дойдум-Саха сирэ!" тиэмэлээх Саха Өрөспүүбүлүкэтин күнүн үөрүүлээхтик бэлиэтээтибит. Өрөспүүбүлүкэбит былааҕын киэн тутта күөрэччи тутан, өрөгөйүн ырыатын өрө көтөҕүллэн ыллаатыбыт. Саха сирин автономиятын турууласпыт, саха дьонугар көҥүлү а5албыт норуот чулуу уолаттарын: П.А.Ойуунускайы, М.К.Аммосовы, И.Н.Бараховы - ахтан-санаан аастыбыт, сырдык мөссүөннэригэр сүгүрүйдүбүт. Бу бэлиэ күҥҥэ үөрэнээччилэр да, учууталлар да үрдүк ситиһиилэрэ - өрөгөйбүтүн өссө үрдэттэ. Ол курдук, үөрүүлээх линейка5а 11- с кылаас үөрэнээччитэ Сивцева Мария Саха Өрөспүүбүлүкэтин төрүт оонньууларыгар (хабылык, хаамыска) успуорт маастара буолбутун туоһулуур бэлиэтин, докумуонун, химия учуутал Лугинова Лидия Николаевна Саха Өрөспүүбүлүкэтин үөрэхтээһинин эйгэтигэр "РНГ" хампаанньа тэрийбит күрэ5эр кыайан, 100.000 солк. бириэмийэтин туоһу суругун - туттулар. Арсентий Акакиев бастакы бэрэсидьиэммит М.Е Николаев кэс тылын линейка5а киэн тутта иһитиннэрдэ. Төрүт култуура учуутала Рожина Е.Е. хас биирдиибитин арчылаан, кыынньар кымыһынан, алгыстаах алаадьынан күндүлээтэ. Айыыларбыт анаабыт курдук үтүө күннэрин мүччү туппакка, оскуолабыт тэлгэһэтигэр күргүөмүнэн тахсан, Найахылыы оһуохайынан оһуор үктээтибит, инникигэ үтүөнү эрэнэн тэрээһиммитин түмүктээтибит.