🔥 Өбүгэ үгэһинэн эр бэрдин иитии: Сыырдаахха «Уус кыһата» күһүҥҥү түһүлгэ түмүктэннэ!

🔥 Өбүгэ үгэһинэн эр бэрдин иитии: Сыырдаахха «Уус кыһата» күһүҥҥү түһүлгэ түмүктэннэ! Балаҕан ыйын 28 күнүттэн 30 күнүгэр диэри Уус-Алдан улууһун И.С. Портнягин аатынан Сыырдаах орто оскуолатыгар уол оҕо кутун уһугуннарар, үлэҕэ-сатабылга уһуйар «Уус кыһата» күһүҥҥү түмсүү үрдүк таһымнаахтык ыытылынна. Үс күн устата 10-тан 16-гар диэри саастаах уолаттар дьиҥнээх эр киһилии кытаанах графикка олорон, төрүт үгэстэри иҥэриннилэр, бэйэ бэйэлэрин кытта сомоҕолостулар. 🔨 Бастакы хардыы: Тимир ууһун кистэлэҥэ. Түмсүү маҥнайгы күнүгэр кэлбит оҕолор медицинскай көрдөрүү справкатын көрүүттэн, олохторун булларыыттан саҕаланна. Саамай сүрүн уонна күүтүүлээх дьарыгынан — норуот маастара Илларион Егорович Попов салалтатынан тимиргэ уһаныы буолла. Уолаттар маҥнайгы күн сылайары да аахсыбакка, улахан интэриэһинэн быһах охсуутун саҕалаатылар. Түмсүү кыттыылаахтарын ортотугар Тааттаҕа улуу маастар Мандар Ууска сылдьан үөрэммит, Найахыттан сылдьар үөрүйэх, Егор Фомин 10-с кылаас үөрэнээччитэ баар буолан, бэйэтин сатабылын үчүгэйдик көрдөрдө уонна доҕотторугар сүбэ быһыытынан көмөлөстө. Хас күн ахсын күүстээх үлэ кэнниттэн уолаттар сууналлар-тарааналлар. Киэһэтин «Майаҕатта удьуордара» (сал.К.Герасимов) оҕо түмсүүтэ бэрт интэриэһинэй аралдьытар оонньуулары ыытта. 🪓 Иккис күн: Мас үөрэҕэ уонна эт-хаан эрчиллиитэ. Түмсүү иккис күнэ оскуола физкультура учууталларын салайыытынан сарсыардааҥҥы дьарыктан саҕаланна. Бу күн уолаттар МПО маастара Ф.Ф. Захаровтыын маска уһаныы сатабылыгар үлэлээн, маһы таҥастыыр тэриллэри кытта билсистилэр. Күнүс ааҕыы, өй уонна айар кут чааһыгар (сал.психолог Антонова Н.Е.) уолаттар бэйэ бэйэлэрин кытта иһирэхтик санаа атастастылар, ис кыахтарын арыйдылар. Эбиэт кэнниттэн тимиргэ уһаныы үлэтэ өссө күүскэ салҕанна — Илларион Егоровичтыын быһахтарын чочуйан, дьэ дьиҥнээх эр киһи малын таһаарарга сыраластылар. Киэһэлик физкультура учууталларын кытта төрүт хамсаныылары уонна эрчими сайыннарар эт-хаан дьарыгын көхтөөхтүк аастылар. 🌾 Үһүс күн: Ытык сиргэ айан уонна быыстапка. Үһүс, түмүктүүр күн уолаттарга уонна тэрийээччилэргэ саамай долгутуулаах күнүнэн буолла. Сүрүн түгэнинэн — төрүт өбүгэбит Майаҕатта Бэрт Хара төрөөбүт-үөскээбит, олорон ааспыт уйаара биллибэт киэҥ, кэрэ көстүүлээх Кыыс Хаҥа алааһыгар экскурсия буолла. Ф.Ф. Захаров уолаттары бу сир-уот устуоруйатын кытта билсиһиннэрдэ, Майаҕатта Бэрт Хара пааматынньыгар сырытыннарда. Түгэни аһарбакка, үс күн устата ыытыллыбыт араас аралдьытар уонна спорт оонньууларын түмүктэринэн кыайыылаахтары добун суруктарынан уонна минньигэс бириистэринэн наҕараадаланнылар. Түмүк быыстапкаҕа уолаттар бэйэлэрин илиилэринэн оҥорбут дьиҥнээх сахалыы быһахтара (маастардар И.Е. Попов, А.А. Шепелев салалтатынан) уонна олоххо наадалаах мас төлөпүөн подставкалара (Ф.Ф. Захаров салалтатынан) турдулар. Бу оҥоһуктары көрөн иитээччилэр да, төрөппүттэр да оҕолорунан дьиҥнээхтик киэн тутуннулар. ✊ Эрэл баар! «Уус кыһата» күһүҥҥү түмсүү үөрүүлээх быһыыга-майгыга уопсай хаартыскаҕа түһүүнэн сабылынна. Уолаттарбыт бэйэлэрин илиилэринэн оҥорбут мас уонна тимир оҥоһуктарын кичэйэн суумкаларыгар угуннулар. Киэһээҥҥи аһылык кэнниттэн сылайбыттарын да умнан, үөрэ-көтө дьиэлэригэр айаннаатылар. Бу үс күн устата уолаттарбыт бэйэлэрин эр бэртэрэ буолалларын бигэргэттилэр. Кинилэр дьиҥнээх эр киһилии кытаанах тулуурдаахтарын, дьулуурдаахтарын уонна бэйэ бэйэҕэ көмөлөһөр иллээх-айылгылаахтарын көрдөрдүлэр. Түмсүү сыала-соруга толору ситиһилиннэ!☀️🙌🏻 ✍🏼 Ньургуйаана Хорунова, Сыырдаах орто оскуолата