МБОУ "Покровская СОШ №1 с УИОП им. И.М. Яковлева"
Образование · 15 сентября 2026 г.
✨Тыа хаһаайыстыбатын практиката түмүктэннэ
✨Тыа хаһаайыстыбатын практиката түмүктэннэ 🥔🥔🥔Ааспыт нэдиэлэҕэ оскуола үөрэнээччилэрэ М.Г. Сафронов аатынан Саха сиринээҕи тыа хаһаайыстыбатын научнай-чинчийэр институтун хонууларыгар хортуоппуй хомуйуутун түмүктээтилэр. Биһиги оҕолорбут үөрэх дьылын тыа хаһаайыстыбатын практикатыттан саҕалаатылар. Сарсыарда эрдэттэн оскуола автобустара, икки төгүллээн, оҕолору үүнүү хомууругар тастылар. Онно оҕолору — хортуоска хомуурун умсугутуулаах үлэтэ барыларын биир сиргэ түмтэ. 👍Үлэ хаамыыта үрдүк таһымнаахтык тэриллибит. Хас биирдии кылаас бэйэлэригэр анаммыт хонуу сирин ыланнар, кылаас салайааччыларын хонтуруолунан үлэни үөрэ-көтө кылгас кэм иһигэр элбэх үүнүүнү хомуйдулар. 🔥Оҕолор айылҕаҕа сылдьан, холбоон үлэлиир үөрүйэҕи ыллылар уонна сыралаах үлэ түмүгүн харахтарынан көрдүлэр. ✔️Бэйэтин санаатын 7 -с кылаас үөрэнээччитэ Данил Васильев үллэһиннэ: "Хортуоппуй үүнүүтэ араас.Бэҕэһээ аҕыйах сиригэр хомуйбуппут, онтон бүгүн үүнүүлээх сиргэ түбэстибит. Доҕотторбун кытта биэс куулу хомуйдубут, онтон бүтүн кылааспытынан 21 куулу хомуйдубут" - диэн бэрт сэргэхтик үлэ хаамыытын Данил сэһэргээтэ. ✔️5- с кылаастар төһө да кыра дьон буоллаллар, биир түмсүүлээхтэрин, үлэни кыайа тутталларын көрдөрдүлэр. Кылаас салайааччыта Татьяна Луковцева оҕолорун ситиһиитин киэн тутта кэпсээтэ: " Бүгүн мин оҕолорбор олус баай үүнүүлээх сир түбэстэ, ол иһин оҕолор өрө көтөҕүүлээхтик элбэх куулу толордулар. Түмүккэ бары күүспүтүнэн 45 куул хортуоппуйу хомуйдубут. Оҕолорбунан киэн туттабын олус хайҕаллаахтык үлэлээтилэр" - диэн санаатын үллэһиннэ. 🥣🍞☕️Институт үлэһиттэрэ оҕолорго, учууталларга, үлэһиттэргэ сылаас тотоойу эбиэти тэрийдилэр. Сибиэһэй салгыҥҥа үлэлээн баран минньигэс итии миини иһэн, сымнаҕас килиэби, саахардаах чээйинэн күндүлэн күүстэригэр күүс эбиллэн бэрт сэргэхтик үлэни өрө туттулар. Оҕолор тыа хаһаайыстыбатын практикатыгар сылдьыылара кинилэр бэйэни салайыныыларыгар, сайдыыларыгар уонна кэлэр кэскиллэригэр улахан суолталаах. Бу судургу үлэ эрэ буолбакка, оҕону олоххо бэлэмниир күүстээх иитии биир тутаах хайысхата буолар.Оҕо бэйэтин илиитинэн тутан-хабан үлэлииргэ үөрэнэр. Кини ас хайдах кэлэрин, сир үлэтин ыараханын уонна сыаната улаханын өйдүүр. Өссө биир улахан суолтата, оҕолор бөлөҕүнэн үлэлииргэ үөрэнэллэр. Тыа хаһаайыстыбатын үлэтэ соҕотох киһи күүһүнэн барбат. Оҕолор бэйэ-бэйэлэригэр көмөлөһөн, биир сыаллаах-соруктаах буоларга, хамаанданан үлэлииргэ үөрэнэллэрэ олус суолталаах. 💝Оскуолабыт салалтата уонна үлэһиттэрэ М.Г. Сафронов аатынан Саха сиринээҕи тыа хаһаайыстыбатын научнай-чинчийэр институтун салайааччыларыгар уонна үлэһиттэригэр дьиҥнээх науканы уонна тыа хаһаайыстыбатын чугастан билсэр кыаҕы ууммуккут иһин, ону таһынан итии-истиҥ көрсүһүү уонна дэлэй күндү-мааны остуол иһин ис сүрэхтэн махталларын тиэрдэллэр. 🍂🍃🥳Манан, күһүҥҥү тыа хаһаайыстыбатын практика бэрт таһаарыылаахтык түмүктэннэ! #МБОУПокровскаяСОШ1сУИОПимИМЯковлева #ХангаласскийУлус #ДвижениеПервых #СельскохозяйственнаяПрактика #Картошка #Субботник